Бо чылдың 9 айының дургузунда En+Group деп российжи холдинг Тыва Республиканың чурттакчы чонунга социал өртек-биле 105 600 тонна хөмүр-дашты чүдүрүп чоруткан. Ол болза чоннуң чыл санында хөмүр-дашка хереглелиниң барык 90 хуузу болуп турар. «Социал хөмүр» деп республика төлевилелин езугаар хөй ажы-төлдүг өг-бүлелер ам-даа ийи муң тонна хөмүрнү алыр. Одалга сезонунуң бүдүүзүнде республиканың Одалга болгаш энергетика яамызы биле En+ Group деп холдингиже кирип турар “Тываның даг-руда компаниязы” керээни чарып, хамаарышкан документилерге атты салганнар.
«Социал хөмүр» деп төлевилел 2016 чылда ажылдап эгелээн болгаш хөй ажы-төлдүг тыва өг-бүлелерге ажыг кышты хүр ажып алырынга дузаламчы кылдыр көрдүнген. Ук төлевилелдиң боттанылгазынга Тываның даг-руда компаниязы база киржип турар. «Социал хөмүр» деп төлевилел езугаар ук компания чылдың-на бир муң тонна хире халас хөмүрнү чүдүрүп чорудуп турган, бо чылын ооң хемчээлин ийи катап көвүдеткен. Амгы үеде Чадаананың болгаш Каа-Хемниң хөмүр-даш уургайлары керээде көрдүнген чүүлге дүүштүр хереглекчилерге хөмүрнү долузу-биле чүдүрүп чоруткан. Ооң чедирилгезин ТР-ниң Одалга болгаш энергетика яамызының база тус чер чагыргаларының күжү-биле күүседип турар.
Тываның даг-руда компаниязының чиңгине директору Валерий Куликов:
– Бистиң компания бодунуң ажыл-чорудулгазынга харыысалгалыг чоруун көргүзүп, онаанган хүлээлгелерин кезээде күүседирин кызыдып турар. «Социал хөмүр» деп төлевилел ниитилелдиң амыдыралынга тоң чугула база үре-түңнелдиг, ол чүнүң-даа мурнунда хамаатыларның шыдалы кошкак кезээн – хөй ажы-төлдүг өг-бүлелерни деткииринче угланган. Дузаламчы хөмүрнүң хемчээлин улгаттырганының ачызында бо кыжын 900 ажыг тыва өг-бүле чылыг кыштаар.