Чылдың-на декабрь 22-ниң хүнүнде Россияда Энергетиктер хүнүн демдеглеп эрттирип турар. Декабрь 22-де Кызылдың Үндезин тыва культура төвүнге аңаа тураскааткан байырлыг хурал болуп эрткен. Тыва Республиканың Баштыңы Владислав Ховалыг аңаа сөс ап, Тываның энергетиктеринге байыр чедирген:
“Энергетика – экономика хөгжүлдезиниң болгаш ажыл-амыдыралдың бүгү талазының үндезини. Ук адырның бүзүрелдиг ажылындан чоннуң амыдыралы дорт хамааржыр. Бажың бүрүзүнге чылыгны, чырыкты болгаш делегей-биле харылзааны олар харыылап турар.
Профессионал байырлалывыс Энергетиктер хүнү-биле сеткилимниң ханызындан байырны чедирдим. Чүге дээрге бодумнуң ук адырга ажылдап чораан үемни онзазы-биле үнелээр мен. Амыр эвес одалга сезонунда чылдың эки түңнелдери болгаш карак кызыл ажылыңар дээш шуптуңарга өөрүп четтиргеним илереттим. Силерниң үнелеп четпес ажылыңар болгаш ёзулуг патриотчу чорууңар дээш силерге мөгейдим. Ол ышкаш Чаа чыл болгаш Рождество байырлалдары-биле база байырны чедирип, силерге болгаш чоок кижилериңерге кадыкшылды, чаа-чаа чедиишкиннерни, тайбыңны болгаш чаагай чорукту күзедим”.
Тываның үлетпүрүнүң хөгжүлдезинге энергетика кончуг чугула ужур-уткалыг. Бо чылын Президентиниң болгаш федералдыг чазактың ачызында Энергия хандырылгазының комплекстиг планын боттандырып эгелээн. Ооң күүселдези-биле улуг инвестиция төлевилелдеринге, социал адырга болгаш чурттаар оран-сава тудуунга эптиг байдал тургустунар дээрзин Тываның Баштыңы демдеглээн.
Агаар арыглаары-биле, Президентиниң кадет училищезин, “Сүбедей” спорт өргээзин база өске-даа 12 биче одалга черлериниң хереглекчилерин төпчүткен чылыг хандырылгазынче кожар сорулганы салган.
Вавилин ээтпээнде барык 8 муң чурттакчылыг, 1500 ажыг бажыңнарлыг 2 улуг дача ниитилелдериниң чырык четкилерин чаартырынга 26 сая рубльди аңгылаан. “Тываэнергонуң” ажылдакчылары ол ажылды доозар четкен.
Энергетика болгаш одалга адырынга хөй чылдарда ак сеткилдиг ажылы дээш ТР-ниң Баштыңының Хүндүлел бижии-биле “Россети Сибирь Тываэнерго” акционерлиг ниитилелдиң ажылдакчылары Галина Валиеваны, Аяс Дамбаны шаңнаан. Шак ындыг бижиктерни “ТЭК-4” күрүне бүдүрүлгезиниң Ак-Довуракта, Хову-Аксында, Шагаан-Арыгда участоктарының ажылдакчылары Александр Күжүгет, Урана Бюрбю, Артур Сандак олар алганнар.
“ТЭК-4” башкарылга компаниязының” Ак-Довурак участогунуң слесары Александр Күжүгет: “Бо ажылда 12 чыл ажылдап турар мен. Аныяк энергетиктерге мергежилинге бердинип ажылдаарын болгаш кадыкшылды күзедим” – деп, ол чугаалаан.
Ук адырга ажылдаары-биле аныяк салгалдың өзүп олурары база чоргааранчыг. Оларның бирээзи ТывКУ-нуң инженер-техниктиг факультединиң 2-ги курузунуң студентизи Буянды Монгуш ол талазы-биле ортумак эртемни чедип алгаш, энергетика адырынга ажылдаар сорулгалыг дээди өөредилге черинче кирип алган. “Доозупкаш, Россетиге ажылдаар бодалдыг мен. Электрик кылдыр ортумак эртемни дооскаш, бо адырны улам-на сонуургап, келир үеде инженер-электрик болур дээш, бо факультетче кирип алган мен. Бүгү чуртталгазын энергетика адырынга тураскааткан хүндүлүг хоочуннар аразынга кээп, оларның чедиишкиннерин, өөрүшкүзүн үлежири меңээ улуг чоргаарал. Олар ышкаш мергежилимге бердинип ажылдаар күзелдиг мен” – деп, Буянды Монгуш чугаалаан.
Энергетика болгаш одалга адырынга хөй чылдарда ак сеткилдиг ажылы дээш Тываның Баштыңының Өөрүп четтириишкин бижиин “ТЭК-4” КУБ-туң Ак-Довурак участогунуң ажылдакчылары Айдың Бакукка, Людмила Ондарга, Римма Сапыякка база “Россети Сибирь Тываэнерго” акционерлиг ниитилелдиң “Тываэнергосбыт” салбырының ажылдакчылары Алла Крыловага, Чолдугмаа Монгушка, Долгармаа Монгушка тывыскан.
“Бөгүнгү байырлалда бистиң ажылывысты бедик үнелеп турар Тыва Чазакка улуу-биле өөрүп четтир- дим” – деп, Долгармаа Монгуш чугаалаан.
Ол ышкаш Дээди Хуралдың Даргазы Каң-оол Даваа база энергетиктерге байыр чедиргеш, парламентиниң хүндүлел бижиктерин энергетиктерге тывыскан.
ТР-ниң одалга болгаш энергетика сайыды Эдуард Куулар база байыр чедириишкиннеринге каттыжып, яамының шаңналдарын тывыскан.
Ч. КАРА-САЛ.
Буян ООРЖАКТЫҢ тыртырган чуруу.
“Шын” №98 2023 чылдың декабрь 23
