Часкы үер үезинде чамдык чурттакчы чоннуг черлерге халдавырлыг аарыгларга удур, ооң иштинде ижин-шөйүндү аарыгларынга профилактиктиг хемчеглерни сагыырын Тываның Кадык камгалал яамызы сагындырып турар.
Шак-ла мындыг аайыылдыг халдавырлыг аарыглар часкы үер үезинде көвүдээр: сальмонеллез, холера, энтеровирустуг инфекция, вирустуг А гепатит, ижин тиви, аас иштиниң энтериди.
Ижин-шөйүндү инфекциязынга удур профилактика чорударда:
1. Чемненирде, аъш-чем кылыр мурнунда, агаарлаан соонда, арыгланган соонда холун саваң-биле албан чуур;
2. Үер үезинде ижер болгаш ажыглаар суунче улуг кичээнгейни салыр. Ижер сугну, аяк-шынак болгаш ойнаарактар чуур сугну албан хайындырып алыр, шилде куткан сугну заводтан үндүрген гарантиязын көөр;
3. Үер суунга алыскан аъш-чемни ажыглавас база суг четпес черлерге шыгжаар;
4. Ногаа-чимисти эки чуур, аргалыг-ла болза, щетка-биле саваңнап чуггаш, хайындырган сугга чайып чуур;
5. Аъш-чемни ымыраа-сээктен камгалаар;
6. Үерге алыскан черлерде сугларга эштип, хеп чуп болбас.
Суг таварыштыр холера, ижин тиви, вирустуг А гепатит, лептоспироз, энтеровирустуг инфекция халдаар дээрзин сактып алыңар!
Бир эвес эъди изиир, кускузу келир, кустурар, куду олуртур, думаалаар дээш өске-даа демдектери тыптып келген таварылгада, эмнелгеже баар. Халдавырлыг ижин-шөйүндү аараанда, боду эмненип болбас, ол кижиниң, ылаңгыя бичии уругларның кадыкшылынга болгаш чуртталгазынга эң-не айыылдыг.
/ Тываның Кадык камгалал яамызының медээлеринден алган.
"Шын" №43 2023 чылдың июнь 14
