Тускай шериг операциязыныӊ шаӊнаттырган киржикчилеринге беш эки турачы немешкен.
Ноябрь 2-де, Чоннуӊ чаӊгыс деминиӊ хүнү байырлалдыӊ бүдүүзүнде, Тыва Республиканыӊ шериг комиссариады беш эки турачыга «Эрес-дидим чоруу дээш» деп медальды тывыскан. Олар БАРС деп эки турачылар кезээниӊ составы-биле тускай шериг опреациязынга киржип турганнар.
Бо чылын чаа доктааткан «Эрес-дидим чоруу дээш» деп медальды республиканыӊ шериг комиссары Демир-оол Артына тывыскан.
БАРС-тыӊ алдыгы составыныӊ эки турачылары кадыг-берге демиселге дадыккан улус дээрзин ооӊ мурнунда дыӊнадып турган. Чаӊгыс дүне миналыг шөлдү арыглааш, ооӊ мурнунда дайзыннарныӊ чагдатпайн турган кол пунктузун чаза таварыышкын-биле эжелеп алган улус олар болган. Демисел ынчан кончуг дүшкүүрлүг болган.
Шак ол ат-сураглыг составтыӊ чамдык дайынчылары ам-даа мурнуку одуругда демисежип турарлар. Шаӊнал тыпсыр ёзулалага Аянчы Чыжыр-оолдуӊ күрүне шаӊналын ооӊ дуӊмазы Алдынай Алексеевна ап алган.
«Эрес-дидим чоруу дээш» деп медаль-биле Шолбан Тюлюшту, Александр Ондарны, Мурат Сандыкмааны шаӊнаан.
«Дайынчы шылгарал дээш» деп медальды Кара-оол Доӊгакка тывыскан. Тускай шериг операциязыныӊ эгезинде ол кол разведка эргелелиниӊ разведчиги турган. Тос ай хуусаалыг керээзин күүсеткен соонда, БАРС эки турачылар кезээнге бижидип алган.
Шаӊнаттырган улус аӊгы чугаа үезинде: «Бистиӊ кол чажыдывыс дээрге дайынчыныӊ ок-чепсээниӊ үш комплектизин бодувуска үргүлчү ап алгаш чораанывыс-тыр. Бир азы оон-даа хөй хонуктуӊ хүнезинин безин кааптар турдувус. Кажанда-даа эвээш болбас чүүлдерниӊ бирээзи патроннар болур. Аар-даа болза, үргүлчү холга белен чорзун» — дээн.
Эки турачылар-биле шак шагы-биле чугаалажып болур. Бир эвес кижи бүрүзүнүӊ дугайында бижиир болза, чаӊгыс эвес, хөй ном үнүп кээп болур.
Тыва Республиканыӊ Шериг комиссариадының медээзинден Р. Демчик очулдурган.
