Январь 16-да Тыва Республиканың Чазааның чанында Тываның гуманитарлыг болгаш социал-экономиктиг тускай шинчилелдер институдунуң директору Вячеслав Март-оол Россияның парлалга хүнү эрте-даа берген болза, аңаа тураскааткан ужуражылганы республикада билдингир журналистер-биле эрттирген.
Ужуражылга үезинде институттуң удуртукчузу Россия болгаш Тываның төөгүзүнге хамаарышкан билиглер, амгы ниитилелдиң нарын айтырыглары болгаш археология, улустуң аас чогаалы, дыл, экономика болгаш өске-даа адырларга хамаарышкан регионнуң эртемденнериниң чорудуп турар эртем-шинчилел ажылдарын чырыдарынга база ниити тыва эртемни нептереңгейжидеринге киириштирип чоруур үлүг-хуузу дээш МИЧ ажылдакчыларынга четтиргенин илереткен.
Амгы үеде информастыг ажыл-чорудулганың делгемнериниң хевирлери чаа шагның негелделеринге дүүштүр өскерлип турарын журналистер чугаалааннар. Ылаңгыя эртем дылынга бижиттинген улуг хемчээлдиг материалдарны, чижээ, “Шын” солунга чырыдары чамдык таварылгаларда болдунмайн баары харааданчыг. Чүге дээрге солуннуң чаа формадынга дүүштүрер дээш эртем дылынга бижээн чүүлдү солун дылынче эткеш, кызырарга, эртемденнер чамдыкта чөпшээрешпейн баар. Ол байдалды эде көрүп, солунга чырыдыксаан материалдарын номчукчуга чедингир кылдыр кыска хемчээлдиг бижиирин “Тывамедиабөлүк” холдингиниң директору Надежда Сат эртемденнерден дилээн.
Үнүп келген чылда Тываның чонунга ажыктыг чүүлдерни чедимчелиг чырыдары-биле эртемденнер-биле кады ажылдажылганы кандыг угланыышкынныг уламчылаарының дугайында институттуң удуртукчузу журналистер-биле дугуржуп чугаалашкан.
Ужуражылгага киришкен “Тыва” КТРК-дан Тываның алдарлыг журнализи Виталий Кузнецов, “Тувинская правда” солуннуң кол редактору, Тываның алдардыг ажылдакчызы Александр Филатенко, Тыва Республиканың Чогаалчылар эвилелиниң даргазы, Тываның алдарлыг ажылдакчызы Саяна Өндүр, “ТываМедиаБөлүк” ПБ-ниң директору Надежда Сат, “Твой информ” солуннуң кол редактору Наталья Черноусова, “Шын” солундан Карина Монгуш болгаш “Поддержка” республика төвүнүң парлалга секретары Алдынай Тюлюшке институттуң мурнундан хол белектерин болгаш редакция бүрүзүнге торттарны сөңнээн.
#ТИГПИ
#Парлалгахүнүнге
Эртем биле журналистика
17 января 2023
36