Бир-ийи дашка водка, виски азы стакан пиво ижиптерге, кижиниң ханында арага 0,2–0,5 промилле чеде бээр. Ынчан чолаачы кижи машинаның чоруун дүргедедиксээр, өске автомобильдерниң халдып турарының дүргенин, долгандыр чүүлдерниң хемчээлин тодарадып шыдавас апаар.
Пивону 1–2, вискини 2, водканы азы коньякты 3–4 дашка чедир ижиптерге, 0,5–0,8 промилле чеде бээрге, чырыкты болгаш кызыл өңнү көөрү берге апаар. Ынчан орукка айыылдыг таварылгаларны эскербейн баар. Орук шимчээшкининиң өске киржикчилериниң манёврларын эскерери оожумнай бээр азы шуут эскербес.
Кажан пивону 4–5 стаканны, винону болгаш шампанскоени бир шилди, водканы 10 дашка чедир ижиптерге, азы ханда арага 0,8–1,2 промилле чедерге, үстүнде айыттынган болуушкуннар дам-на өөскүүр. Ынчан машина башкарып шыдавайн, секунда санында болу берги дег айыыл-халапты безин бодавас апаар. Эзирик чолаачыга удур келген-даа, мурнунда-даа машиналарның аразы кайы хире ыракта чоруп турарын тодарадыры улам бергедээр. Ооң шимчээшкини оожургап, долгандыр болуушкуннарны билбестеп, машинаны хөделдирер, доктаадыр педальдарны будап эгелээр. Терге болгаш мотоцикл чолаачыларынга дорт халдыры шуут болдунмас.
Кажан ханда арага 1,2–1,5 промилле чедерге, автомобиль башкарары шуут болдунмас, хөй кезии машиназын хаггаш, эптиг кылдыр тургузуп безин шыдавас болур.
Кажан-даа 50 мл водка азы 500 мл пивону ижип алгаш, айыыл чок машина башкарар мен дээри чазыг-дыр. Араганың айыыл чок хемчээли деп чүүл турбас. Чолаачының эзирииниң хемчээлин тодарадыры берге, кижи-даа, байдал-даа аңгы болур.
Машина башкарары болгаш биче-даа хемчээлдиг арага ижери кандыг-даа байдалда дүүшпес чүүл-дүр!
Аяна ОНДАР, Республиканың наркология диспансериниң дүрген наркологтуг дуза салбырының психолог-нарколог эмчизи.
«Шын» №100 2023 чылдың декабрь 30