“Өг-бүле” национал төлевилелге кызыгаарлаттынып “Өг-бүлениң ыдыктары болгаш культуразының инфраструктуразы” федералдыг төлевилел боттанып турар. Культура бажыңнарының аразынга ажылдың тергиин арга-дуржулгаларын илередири-биле Бүгү-российжи мөөрей болуп эрткен. Аңаа Тывадан Чаа-Хөл кожууннуң Культура бажыңы тиилекчилерниң аразынче киргеш, 3 сая рубль деткимчени алган. Ол ышкаш регион база 30 303 рубль акшаландырыышкынны үндүрүп берген.
2026 чылдың апрель 20-ден 28-ке чедир Чаа-Хөлдүң Культура бажыңының Культура-өөредиглиг методиктиг төвүнүң эргелекчизи Солаңгы Чапчын “Новосибирск облазының күрүнениң Улусчу чогаадылга бажыңынга” билиг бедидер немелде профессионал өөредилгени эрткен. Ук программа “Чаңчылчаан улусчу байырлал амгы үениң социокультурлуг делгеминде” деп теманы өөрениринче угланган. Ооң иштинде “Культура адырында төлевилел ажылы” деп модуль база кирип турар.
Өөредилгениң түңнелдери-биле Солаңгы Чапчынга билиин бедиткен дугайында документини тывыскан.
Чаа культура делгеминиң албан ёзугаар ажыдыышкынын “Чуртталганың угулзалары диригжиткен дашта” деп даш чонукчуларының республика чергелиг делгелге мөөрейин эрттирип тургаш кылырын планнаан. Ук хемчегни 2026 чылдың сентябрь 15-19 хүннеринде Чаа-Хөлдүң Культура бажыңынга хоочун даш чонукчузу Черзи Хола-Салович Монгушка тураскаадып эрттирер.
/ Чыжыргана СААЯ.
Медээлерни болгаш чуруктарны кожууннуң чагыргазындан алган.
“Шын” №24 2026 чылдың июнь 25
"Шын" солуннуң МАХ-каналынга каттыжыңар: max.ru/join/egenQ...