«Ада-чурттуӊ камгалакчылары» күрүне фондузунуӊ Тывада салбыры улуг кожууннар төптеринге хамаатылар хүлээр пунктуларны тургузар.
«Ада-чурттуӊ камгалакчылары» күрүне фондузу дайынчы хөделиишкиннерниӊ хоочуннарынга болгаш тускай шериг операциязыныӊ үезинде мөчээн шериглерниӊ өг-бүлелериниӊ кежигүннеринге дузалажыры-биле улуг кожууннарныӊ төптеринге хамаатылар хүлээр пунктуларны ажыдарын планнап турар.
Эрткен неделяда ук фондунуӊ Тывада салбырыныӊ төлээлери Улуг-Хем биле Кызыл кожууннарныӊ чурттакчыларын хүлээп турган.
Фондунуӊ Улуг-Хем кожуунда социал координатору ажыл хүннеринде хоорай чагыргазыныӊ бажыӊынга ажылдаар. Адрези: Шагаан-Арыг хоорай, Дружба кудумчузу, бажыӊ 55 «а», 3-кү каът.
Кызыл кожуунда фондунуӊ социал координатору кожуун чагыргазыныӊ бажыӊында хүлээп турар. Адрези: Каа-Хем суур, Таежная кудумчузу, бажыӊ 20, кабинет 206.
Күрүне фондузунуӊ Кызыл хоорайда офизин июнь 1-де байырлыг ёзу-биле ажыткан. Ол найысылалдыӊ Кызыл партизан кудумчузу, бажыӊ 30 деп адресте турар.
Дайынчы хөделиишкиннерниӊ хоочуннарынга болгаш тускай шериг операциязыныӊ үезинде мөчээн шериглерниӊ өг-бүлелериниӊ кежигүннеринге эмчи, социал реабилитация, эм-таӊ хандырылгазы, психологтуг болгаш юридиктиг дуза чедирер, саноторий-курорт эмнээшкини алыр айтырыглар талазы-биле ачы-дуза чедирер.
«Ада-чурттуӊ камгалакчылары» фондунуӊ регионалдыг салбырыныӊ медээлеринден Р. ДЕМЧИК белеткээн.
"Шын" №51, 2023 чылдың июль 12.