РФ-тиң Президентизи Владимир Путинниң 2023 чылдың ноябрь 22-де ат салган Чарлыы ёзугаар 2024 чылды Россияда Өг-бүле чылы кылдыр чарлаан.
Кандыг-даа ниитилелдиң кол өзээ өг-бүле болганда, үнүп келген чылды ынчаар чарлааны ханы уткалыг дээрзин шупту билип турар. Кажан хөй омак-сөөктүг чурттуң төөгүзүн кадагааты чурттар өштүү-биле өскертирин кызып, ооң маадырлыг эрткен оруун балаар сорулгалыг хөделиишкиннерни чорудуп турда, бүгү чоннуң демниг чоруу чугула. Ол ышкаш келир үениң салгалынга мөзү-шынар болгаш патриотчу кижизидилгени чорударынга быжыг өг-бүлелерниң ролю улуг дээрзи маргыш чок.
Күрүнениң талазындан өг-бүле айтырыынче улуг кичээнгейни кезээде салып турган, ам-даа күштелдирер сорулга-биле чер-черлерде хөй хемчеглер болуп турар. Оларның бирээзи, Россияның хөй-хөй хоорайларында Өг-бүле парктарын тургузуп, чаартып кылып турар. Тыва база оон чыдып калбаан. 2020 чылда Кызылга Өг-бүле парыгын кылган. Ону “Таарымчалыг хоорай хүрээлеңин хевирлээри” федералдыг төлевилел-биле кылганын сагындырары, артык эвес.
Чарлаттынган чылда Кызыл хоорайның девискээринде “Өг-бүле парыгынга” хөй солун хемчеглер болгулаар дээрзинге чигзиниг чок. Бо парктың онзагайы, ында бүгү чүүлдерни уруг-дарыы-биле кады келген ада-иелерге дыштанырынга таарымчалыг болзун дээш кылган. Оон аңгыда, республиканың үлегерлиг өг-бүлелериниң чуруун, кыска медээзин аскан Хүндүлел самбыразын тургускан. Ооң байырлыг ажыдыышкынын Өг-бүле болгаш шынчы чоруктуң хүнүнде кылганы база онзагай.
Бо хүнде Кызылда Өг-бүле парыгы улуг-биче чурттакчыларның агаарлап, дыштаныр ынак чери апарган. Чайын-даа, кыжын-даа оон улус үзүлбес. Ылаңгыя агаарлап келген аныяктарга, келир үезинде өг-бүле тударда, шыңгыы харыысалгалыг болурунга шак ындыг парк черле салдарлыг дээрзи чигзиниг чок.
Чурттуң Президентизи Владимир Путинниң эгелекчи саналы ёзугаар аңгы-аңгы угланыышкыннарлыг национал төлевилелдерни каш чыл улай боттандырып турарын көрүп турар бис. Ол төлевилелдерниң кол утказы, чоннуң амыдырал-чуртталгазының шынарын экижидери, оларның чурттап турар девискээрин чаагайжыдарынче көрдүнгенин канчап эки дивес боор. Тулган эки төлевилелдер-дир. Ам-даа чуртувус хөгжүп, сайзыразын-на!
Бистиң корр.
Чуруктарны интернеттен алган.
«Шын» №7 2024 чылдың январь 31
