Январь 12-де Кызылдың ХБАБ эргелелинге 2024 чылдың эң баштайгы бадыланышкан аныяк өг-бүлезин болгаш эң баштайгы төрүттүнген кызылчыны бүрүткээн байырлыг хемчег болуп эрткен.
Байырлыг хемчегге хоорайның тус чер эрге-чагыргазындан удуртукчулар болгаш аас-кежиктиг хүнүн демдеглеп турар аныяктарның дөргүл-төрелдери байыр чедирип киришкен.
Кызыл хоорайга 2024 чылда эң баштайгы чаш төл Орлан биле Чойганмаа Кыртынмайларның өг-бүлезинге төрүттүнген. Өг-бүлениң өөрүшкүзү – ажы-төлүнүң дөрт дугаары болган кыс январь 1-де 00:01 минута турда 3,9 килдиг төрүттүнген. Ооң адын делегейде билдингир төөгүлүг полководчу Чиңгис-Хаанның авазы Оэлунга тураскаадып адаан. Кызылдың ХБАБ эргелелинге чаа төрүттүнген чаштың эң бир дугаар документизи – херечилелин ооң ада-иезинге тывыскан.
Оон аңгыда, ол-ла хүн 2024 чылда эң баштайгы өг-бүле туткан аныяктарның бадыланышкан байырлалы болган. Хоойлу ёзугаар өг-бүле болган дугайында херечилелди Юмер биле Алдынай Тувекейлер алгаш, ынакшылдың болгаш ашак-кадай болганының сүлде демдээ – алдын билзектерни солушканнар.
Чаа өгленишкен аныяктар кайызы-даа 20 харлыг ТывКУ-нуң география факультединиң студентилери болган. Оларның бо чылдың январь 1-де дун оглу төрүттүнгени база бир улуг өөрүшкүнү сөңнээн.
Россияның Президентизи Владимир Путин 2024 чылды Өг-бүле чылы кылдыр чарлаанын сагындыраал. Шак ындыг шиитпирни хүлээп тура, өг-бүлениң чаңчылчаан үнелерин бедидип, ону кадагалап камгалаарынче ниитилелди ол кыйгырган. Оон аңгыда, бо чылын кадык-чаагай өг-бүлени нептереңгейжидери болгаш күрүнениң талазындан ону камгалаар талазы-биле хемчеглерже кичээнгейни угландырары көрдүнген.
Бистиң корр.
Ада Тюлюштуң тырттырган чуруктары.
"Шын" №2 2024 чылдың январь 13
