Тывада Росхереглелхайгааралының регионалдыг эргелелиниң специалистери санитар-эпидемиологтуг хемчеглерни күштелдирери чугула деп сагындырган.
Эрткен неделяда республика девискээринде грипптиң А хевиринден аараан ийи таварылганы лабораторияга бадыткаан. Олар Кызыл хоорайның чурттакчылары болган. Оон аңгыда, регионнуң найысылалында уруглар сады барып турар үш харлыг бичии уругдан грипптиң В хевири база тывылган. Күрүнениң вирусология база биотехнологияның «Вектор» эртем төвүнче бичии уругдан алган биоматериалды хандыр шинчилээр кылдыр чоруткан.
Грипп кедерей бээр болза, айыылы улуг. Ол антибиотиктерге алыспас, халдавырлыг дегдириишкинче дүрген шилчип болур, ынчангаш шын эмнээшкинни чорудары чугула. Ындыг болганда, боду эмненмейн, эмчиге хынадып, шын диагнозту салдырып, тодаргай эмнээшкинни алганы дээре. Аарывас дизе, камнанырының бөдүүн дүрүмнерин сагыыр: хөй-ниити транспортунга база кижилер чыылган черлерге эмчи масказын кедер, кудумчуже үнгеш-киргеш, холдарны база думчук үдүн чуур.
Эрткен неделяга көөрде, ОРВИ-ден аарыыр чорук эвээжээн, 491 турган болза, 453 кижи аараан. 7-ден 14 хар аразында уругларның аарыыры 26 хуу эвээжээн. А 15 хардан өрү назынныг элээдилерниң база улуг улустуң аарыыры эрткен неделяда 10,3 хуу көвүдээн. Тываның найысылалы Кызыл хоорайда аарыг кижилер саны 20 хуу өскен.
Коронавирус халдавырындан 56 кижи аараан, оларның 40-и – улуг кижилер болза, 16-зы — 17 харга чедир чаштар болгаш элээдилер.
Хүнде ортумаа-биле сес кижи covid-19-тан аарып турары бадыткаттынган. Бөгүнде республиканың халдавырлыг аарыглар эмнелгезинде 28 кижи эмнедип чыдар, үш кижиниң байдалы аар. Аарыг 54 кижиниң байдалы чиик болгаш, амбулаторлуг эмнээшкинде.
Өөредилге албан черлеринге Чаа чылдың хемчеглерин эрттирип тургаш, кижи бүрүзү масканы ыяап-ла кедерин республиканың эпидемиология албаны сүмелээн. Эмнелге болгаш социал албан черлериниң удуртукчуларын маска кедер чурумга контрольду күштелдирерин кыйгырган.
ТР-ниң Чазааның парлалга албаны.
Чурукту интернеттен алган.
“Шын” №99 2023 чылдың декабрь 27