Кинотеатрга…
Соктай-оол кинотеатрда келген. Кино-даа эгелээн-не. Барык-ла кинонуң орту чедип орда, күжүр Соктай-оолдуң ишти хеверип эгелээн. Бүдүү хей үндүрүптер бе дээрге, чоннуң хөйү-даа кончуг. Дыңнап кагза эпчок болгай. Ынчап олурда, ол көрүп олурган кинозунда дааш-диңмиттии аттыг кылдыр поезд халдып келген. Соктай-оол шимээнни ажыглап элээн дыңзыг кылдыр озура каапкан-дыр. Поезд-даа халып эрте берген.
Залда ам база шимээн чок апарган. Ол аразында чанында олурган кижи Соктай-оолду оожум тырта каапкаш:
— Буруудатпайн көрүңер. Ам чаа эрткен поездиниң сөөлгү вагоннарында туалеттиг болганы ол ирги бе? Кедергей чыдып келди — деп-тир.
Ынакшыл эми
Аптекага кырган-авазы биле 4–5 харлыг оол кирип келген. Кырган-авазы эмнерин садып ап турда, оол тургаш, «Ынакшыл эмнерин база ап ал даан, төнүп турар ийик чоп» деп барган. Кырган-авазы эпчоксуна бергеш, «Бисопролол» биле «Кардиомагнил» деп эмнерни база немей садып алган. Чүрек аарыынга ижер, чүрек дүрзүлүг эмнерни бичии оол ынчаар адаар болган.
Ары өө
Долдаш-оол херим ажыр кожазындан айтырган:
— Ээй, Тавак-оол! Дүүн дыка-ла хөгледиңер аа. Шуптуңар херим иштин бир кылдыр маңнажып, самнап турганыңарны көрдүм.
— Чок, хөглеведивис!
— Мегелеве даан, кожам!
— Арныңны безин көр даан, ыжа берген.
— Харын, кырган-ачам билбейн ары өө буза тыртыпкан кижи-дир ийин.
"Шын" №44 2023 чылдың июнь 17
