Экии, «Шын» солун редакциязы!
Хөй ажы-төлдүг өг-бүлелерге чиигелделер дугайында кайда-даа бижип-ле турар. Ылаңгыя социал четкилерде ол медээлер хөйү-биле тарап турар. Чоокта чаа үш ажы-төлдүг бир төрелим «Хөй ажы-төлдүг өг-бүлениң шынзылгазын» холумга алдым деп чуруун көргүскеш, бижип каан болду. Ол шынзылганың дугайында албан езузу-биле таптыг тайылбырлаан чүүл чок. Ону кайыын билип ап болурул? Каш ажы-төлдүг улуска бээр чүвел? Ол шынзылганы алган улуска кандыг чиигелделер турар? Бо дугайын тайылбырлап берип көрүңерем.
/ Ольга УВАНЗАЙ.
Тес-Хем кожуун.
РЕДАКЦИЯДАН: Тыва Республиканың Чазааның 1153 дугаарлыг 2004 чылдың декабрь 29-та үнген «Тускай категорияларга хамааржыр хамаатыларга күрүнениң социал деткимчезиниң дугайында» деп доктаалы езугаар хөй ажы-төлдүг деп эрге-байдалга 3-тен хөй ажы-төлдүг өг-бүлелер хамааржыр. Ындыг эрге-байдалды тус черниң хоорай, кожууннарының социал камгалал органнары тыпсыр.
Хөй ажы-төлдүг өг-бүлелерге чамдык социал деткимчелер хамааржыр, чижээ, уруглар садтарынга бирги оочурда тургузар, өөредилге албан черлериниң ада-ие төлевирлериниң чамдык кезээн эгидер, халас чер участогу, чайгы кадыкшылга-дыштанылга лагерьлеринче халас путёвканы тургускан чурум езугаар бээр.
Ол ышкаш 5-тен хөй ажы-төлдүг өг-бүлелерге регионалдыг ие капиталы, 4-тен хөй ажы-төлдүг өг-бүлелерге «Социал хөмүр» губернатор төлевилели база ажылдап турар. Культура болгаш спорт албан черлеринге хөй ажы-төлдүг өг-бүлелерге чиигелделер база бар. Ол ышкаш чамдык хуу сайгарлыкчылар чиигелделерни тургускан, чижээ, «Светофор» садыглары, «ДА» биле «Здравушка» аптека четкилери, хуу медицина албан черлери база ойнаар өрээлдер дээш оон-даа өске.
2025 чылдың январь 1-ден тура чуртталга-коммунал чедирилгезиниң төлевиринге 15 хуу чиигелдени тургускан.
Деткимче алырда, чурттап турар чериниң аайы-биле социал албан черлеринче баар. Консультация алыр телефоннар: 8 (39422) 3-15-79, 8 (39422) 3-05-99.
“Шын” №13 2025 чылдың апрель 10