Тыва Республиканың 2025 чылда республика бюджединиң күүселдезиниң дугайында чыл отчёдунга хамаарыштыр хөй-ниити дыңнаашкыннар 2026 чылдың июнь 4-те ТР-ниң Чазааның бажыңынга болуп эрткен.
Дыңнаашкыннарга Тыва Республиканың Дээди Хуралының (парламентизиниң) депутаттары, Тыва Республиканың Чазааның кежигүннери, федералдыг албан черлериниң харыысалгалыг ажылдакчылары, муниципалитеттерниң удуртукчулары, хөй-ниити организацияларның төлээлери киришкен. Хөй-ниити дыңнаашкыннарны Тыва Республиканың Дээди Хуралының Даргазы Каң-оол Даваа башкарып эрттирген.
Тыва Республиканың 2025 чылда республика бюджединиң күүселдезиниң дугайында чыл отчёдунга хамаарыштыр хөй-ниити дыңнаашкыннар бюджет чорудулгазының дугайында хоойлу ёзугаар албан чорудар ужурлуг хемчег дээрзин Тыва Республиканың Чазааның Даргазының оралакчызы Эдуард Сандан демдеглээш, 2025 чылда республика бюджединиң күүселдезиниң кол сорулгалары – Тываның чурттакчы чонунуң мурнунга социал хүлээлгелер күүсеттингенин айыткан.
Тыва Республиканың 2025 чылда социал-экономиктиг хөгжүлдезиниң түңнелдериниң дугайында ТР-ниң экономиктиг хөгжүлде болгаш үлетпүр сайыдының бирги оралакчызы Снежана Ховалыг, ТР-ниң саң-хөө сайыды Орлан Достай, ТР-ниң Санажылга палатазының даргазы Александра Ооржак олар илеткээннер. Республикага 2025 чылда социал-экономиктиг байдал нарын-даа турган болза, макроэкономиктиг чедиишкиннер барын олар демдеглээннер. Чижээлээрге, республиканың бюджединче орулгалардан үндүрүглер киирер план 99 хууга күүсеттинген, үндүрүглерден болгаш өске-даа төлевирлерден 20 млрд рубль бюджетче кирген. Садыг-саарылгада, энергетикада, болбаазырадылга адырында көргүзүглерниң кудулаашкыны бар-даа болза, республика чогумчалыг социал-экономиктиг байдалды 2025 чылда тудуп шыдаан.
Тыва Республиканың 2025 чылда республика бюджединиң күүселдезиниң дугайында чыл отчёдунга хамаарыштыр илеткелдер соонда, илеткелчилерге айтырыгларны ТР-ниң Дээди Хуралының депутаттары, хөй-ниити организацияларның төлээлери салып, айтырыгларынга харыыларны дыңнааннар.
Тыва Республиканың 2025 чылда республика бюджединиң күүселдезиниң дугайында чыл отчёдунга хамаарыштыр хөй-ниити дыңнаашкыннар үезинде кирген саналдарны болгаш айтырыгларны барымдаалап, ТР-ниң Дээди Хуралының бюджет комитеди түңнел протоколду тургускаш, ону Тыва Республиканың Чазаанче чорудар.
Ш. МОҢГУШ.
Буян Ооржактың тырттырган чуруктары.