Кызылдың Аныяктар өргээзинге июль 24-те «Наадым – 2026» малчыннар байырлалынга тураскааткан тыва дүрүм ёзугаар хөл-шыдыраа маргылдаазы бедик деңнелге болуп эрткен. Маргылдаага ниитизи-биле 93 шыырак дээн ойнакчылар киришкен. Киржикчилерни чурум ёзугаар 4 бөлүкке чарган: 1-2 дугаар бөлүктерге 8 хардан 54 хар чедир херээжен ойнакчылар база 55 хардан өрү хоочун херээжен ойнакчылар; 3-4-кү бөлүктерге 8 хардан 59 хар чедир эр ойнакчылар база 60 хардан өрү хоочун эр ойнакчылар хамааржыр.
Маргылдааның ажыдыышкынында Тыва Республикада Шыдыраа чөвүлелиниң даргазы Ренат Ооржак база маргылдааның кол шииткекчизи, хөл-шыдырааның тренер башкызы Адыгжы Куулар ойнакчыларга изиг байырын чедирип, спортчу тиилелгени күзээннер. Хөл-шыдыраа маргылдаазы 2015 чылдан тура бурун өгбелерниң чаңчылын сагып, киржикчи бүрүзү тыва хевин кедип алган ойнап турары – улуг чедиишкин, чоргаарал. Шыдыраа чөвүлели, тренер башкы Адыгжы Куулар, хоочун ойнакчылар хөл-шыдырааның дүрүмүн амгы үеге дүүштүрүп, өөредилгелерни, шуулганны эрттирип, чаңгыс аай хоойлуну ажылдап кылырын чугаалашканнар.
Орай кежээге чедир болган солун чараш оюннарның түңнелинде боттарының бөлүктеринге дараазында ойнакчылар тергиидээннер. Херээжен ойнакчылар аразынга 1-ги черни Шуру Ондар, 2 дугаарын Арина Иргит, 3-кү черни Анастасия Ооржак үлешкеннер. Херээжен хоочун ойнакчылардан Алла Кенден тиилээн, 2 дугаарын Айлаңмаа Сат, 3-кү черни Байлакмаа Монгуш алганнар. Эр ойнакчыларга 1-ги черни Дүгер Допай, 2 дугаарын Мөңгүн Сарыг-Лама, 3-кү черни Начын Чамзы алганнар. Олар шупту – Кызылдың немелде өөредилге төвүнүң өөреникчилери. Хоочун эр ойнакчыларга 1-ги черни Мерген Анай-оол (Улуг-Хем), 2 дугаарын Валерий Куулар, 3-кү черни Степан Түлүш (иелээ Өвүрден) алганнар. Маргылдаага шаңнал кирген база тиилээн ойнакчылар Спорт яамызының, Шыдыраа чөвүлелиниң база деткикчилерниң мурнундан Кубок, медаль, диплом, акша сертификаттарын алганнар. Чараш бурун тоолда кирген солун оюн, хөл-шыдыраа, сайзырап хөгжүүр болзун.
/ Алексей ЧАМБАЛ-ООЛ, спорттуң хоочуну.
Авторнуң тырттырган чуруктары.
“Шын” №29 2026 чылдың июль 30
"Шын" солуннуң МАХ-каналынга каттыжыңар: max.ru/channel_shyn