Иелер шуулганынга болган делгелгени сонуургап көрүп чорумда, караамга янзы-бүрү хемчээлдиг аргып каан корзинкалар илдиге берди.
Ук кылыглар делгээн столдуң артында аныяк кыс менче хүлүмзүрүп алган көрүп олур. Сонуургааш, айтырып-ла эгеледим. Аныяк кыстың адын Диана Монгуш дээр болду.
Ол бир-ле дугаар интернет четкизинге хендирден аргаан корзинкаларны сонургааш, ону кылырын шенеп көөр деп шиитпирлеп алган. Корзинкалар аргыыр джут деп хендирни «Валдберис» интернет садыгдан тыпкаш, чагыдып алган. Тывада бир-ле дугаар шак-ла ындыг корзинкалар кылып эгелээн кижи Диана Монгуш. Ынчангаш ооң-биле адааннажыпкы дег бүдүрүкчү амдыызында Тывада чок.
Карандаш, демир-үжүк сугар пенал ышкаш стаканнар-даа бар. Шак-ла ындыг стаканнарга чамдык улус косметика-даа сугар. Шампунь, саваң дээн ышкаш чунар херекселдер сугарынга тааржыры-даа бар. Херээжен кижиниң даараныр хендирлерин-даа, каасталгаларын-даа суп ап болур, эмнер-даа суп болур дээш канчаар-даа ажыглап болур янзы-бүрү хемчээлдиг корзинкалар бар болду.
«Кызылда шак-ла мындыг хендирлер садып турар садыг чок. Бар-даа болза, корзинка аргыырынга таарышпас, арай чымчак болур чорду. Чижээлээрге, долгандырыы 35 сантиметр корзинканы 3 хонуктуң дургузунда хостуг үелеримни барымдаалап аргыыр мен» – деп, Диана чугаалады.
Диана чаңгыс чаптанчыг кыстың авазы. Ооң өөнүң ээзи күрүне албан черинде ажылдап турар. Кады төрээннери, ада-иези Диананың чаа эгелеп алган ажылын аажок деткип турар.
Диана амдыызында тускай садыг чок. Хөй кезиинде интернет четкизинде социал бөлүктерден садып алыкчылар кээп турар дээрзин ол чугаалады.
Айдың ОНДАР.
Чуруктарны интернеттен алган.
