Июнь 23-түң хүнүнде Сүбедей спорт өргээзинге эр улус аразынга делегей чергелиг волейбол маргылдаазының ажыдыышкыны болуп эрткен.
“1923 чылдың июнь 28-тиң хүнүн волейболдуң төрүттүнген хүнү деп санап турар. Бо чылын хол бөмбүүнүң 100 чылын демдеглеп эрттирип турар. Ук маргылдаа база аңаа тураскааттынган. Сөөлгү катап бо турнир 2018 чылда болган. Ковид аарыы болган соонда, 1 дугаар эртип турары бо” – деп, Тыва Республиканың Волейбол федерациязының президентизи Чингис Каминов чугаалаан.
Кожа чыдар Моол республикадан Ундрах Лхагва бодунуң командазы болгаш өг-бүлези-биле мында чедип келген. Ол Кызыл хоорайда дөрт дугаар, а ооң өг-бүлези 1 дугаар кээп турарын ол чугаалаан. “Бис Моол республикадан тыва эштеривисти деткип чедип келдивис. Бистиң командавыс чоокта чаа тургустунган-даа болза, ооң кежигүннери арга-дуржулгалыг ойнакчылар. Командавыста шупту 10 кижи бар. Оларның назы-хары аңгы-аңгы. Аразында хоочун ойнакчылар-даа, чаа ойнап эгелээн аныяк-даа спортчулар бар. Тываның Волейбол Федерациязынга мындыг маргылдааларны организастап эрттирип турары дээш өөрүп четтирип тур бис. Маргылдааның киржикчилеринге шуптузунга чедиишкинни күзедивис” – деп, Ундрах Лхагва чугаалаан.
Ук маргылдаа июнь 23-тен 25-ке чедир уламчылаар. Ниитизи-биле 8 команда киржип турар. Оларның аразында Бурят, Моол, Хакас республикалардан болгаш Тывадан 5 команда бар. Тываның командаларынга “Суд приставтары”, “Динамо”, “ОБЯ”, “Башкылар”, “Найысылал” хамааржыр.
Чыжыргана СААЯ.
Буян Ооржактың тырттырган чуруктары.
"Шын" №46 2023 чылдың июнь 24
