Эрткен дыштаныр хүннерде Ийи-Талдың хоочуннары кожуун чергелиг пенсионерлер база хоочуннар аразынга кожууннуң 100, Шагаан-Арыгның 135 чылынга тураскааткан спартакиаданы Ийи-Талдың үстүнде Улуг-Хем эриинде Чыттыр-Салыр деп чурумалдыг чараш черге эрттирген. Аңаа Шагаан-Арыгның «Сорунза» клуву, өөредилге эргелели база сумулардан 6 команда киржип, күжүн шенешкен.
Баштайгы спортчу оюн 12 метр ырактан тир адары болган. Хоочуннар аразында кончуг аңчылар часпас адарын көргүзүп, аразындан тиилекчилер илереп үнүп келген. Арыг-Бажының часпас адар аңчы кызы Чечена Бадыжык бирги черни алган. Эр адыгжылардан ча спортунуң тренер башкызы Ким Сат тиилээн.
Дараазында «Хөглүг старттарга» демниин, аваангырын көргүзүп, бөмбүк теп чаржырынга, скакалка-биле 15 секунда иштинде чеже катап шураптарынга, бөмбүктү часпас октаарынга, ракетка биле теннис шаригин дүжүрбейн чаржырынга ойнааш, Арыг-Бажының хоочуннары биле өөредилге эргелелиниң хоочуннары дең санны алганнар.
Хол бөмбүүнге черле аныяанда ойнап чораан хоочуннар аныяктардан дудак чок ойнаан түңнелинде, Арыг-Үзүү командазы бирги черни чаалап алганнар. Ол аразында хол басчыр оюннар болган. Аңаа өөредилге эргелелинден Александр Лопсан, херээженнер аразындан Арыг-Бажындан Маргарита Димит эң күштүг болганнар.
Шыдыраага «Сорунза» клувунуң «Эне-Сай» командазындан Владимир Маажык, шашкиге Арыг-Үзүү командазындан Элина Балган тиилээн.
Баг тыртыжарынга Арыг-Бажы командазынга чедер күштүг улус тывылбаан.
Уран чүүл көрүлдезинге өөредилге эргелелинге чедер команда чок болган.
Ниити команда аайы-биле кожууннуң өөредилге эргелелиниң командазы бирги черни алган. Олар республиканың пенсионерлер болгаш хоочуннарының спартакиадазынга кожууннуң адын камгалап киржирлер.
Кожууннуң баштыңы Вера Балчый спартакиаданың киржикчилеринге байырын чедирбишаан, ТР-ниң Дээди Хуралының (парламентизиниң) хүндүлел бижиктерин хоочуннар Инга Монгушовна Сүрүң-оолга, Раиса Ликпер- ооловна Сааяга, Балчыр Кыргысович Чамбаага, Каадыр- оол Дамдынович Кыргыска, Валентина Шир-ооловна Шожул-оолга, Дарья Хомушкуевна Онанга тывыскан.
Тиилээн командага база ийиги, үшкү черни алган Арыг-Бажы, Арыг-Үзүү командаларынга хойларны шаңналга тывыскан. Эйлиг-Хемниң малчыны, «ТР-ниң алдарлыг малчыны» аттың эдилекчизи Лориса Оспакайга, база-ла Эйлиг-Хемниң алдарлыг малчыны Александр Күдер- оолга, «Сорунза» клувунуң удуртукчузу, «ТР-ниң алдарлыг ажылдакчызы» аттың эдилекчизи Алевтина Сатка хойлар-биле деткикчилээни дээш кожууннуң хөй-ниити чөвүлелиниң мурнундан четтиргенин илереткеннер.
Кожуун Хуралының Ийи- Талдан депутады Азиата Балган эң улуг назылыг хоочуннарга белектерни сөңнээн.
Улуг-Хем кожууннуң медээлеринден .
"Шын" №65, 2023 чылдың сентябрь 2
