Каа-Хем кожууннуң Дерзиг-Аксы суурга хоочуннарның болгаш инвалидтерниң бажың-интернадының тудуун “Демография” национал төлевилелдиң “Улуг назылыг салгалдар” деп федералдыг төлевилелиниң акшаландырыышкыны-биле 2023 чылдың апрель 3-те эгелээн.
Чаа оран-саваны «Бастион» КХН күрүне керээзи-биле тудуп турар. Ук организация объектини бүрүнү-биле 2025 чылдың декабрь айга чедир тудуп доозар.
Ында тудуг ажылдарында 36 тудугжу болгаш ийи машина-техника ажылдап турар. «Сибирьниң инновациялары» КХН-ниң инженери тудуг ажылын хүн бүрүде чогуур деңнелде кичээнгейге алган. Оран-саваның таваан салып дооскан. Ону амгы үениң негелдези ёзугаар чогуур хыналданы эрткен эки шынарлыг материалдар-биле кылган. Амгы үеде тудуг ажылдары 6 хуу чедир күүсеттинген.
Тываның Күш-ажыл болгаш социал политика яамызының дыңнадып турары-биле алырга, чаа оран-савага 180 хоочуннар болгаш инвалидтер чурттаар. Төлевилел ёзугаар бажың-интернатты амгы үениң дериг-херексели-биле чүмнээр.
Бистиң корр.
Күш-ажыл яамызының медээлеринден.