Казахстанның Алма-Ата хоорайга май 9-11 хүннеринде алдарлыг казах мөге Кажымукан Мунайтпасовтуң 155 харлаанынга тураскааткан 35-60 харлыг хоочун спортчулар аразынга грек-рим, хостуг хүрештерге делегей чергелиг маргылдаа болуп эрткен. Аңаа Беларуссия, Грузия, Италия, Казахстан, Кыдат, Кыргызстан, Моол, Россия, АКШ, Узбекистандан 700 ажыг мөгелер киришкен.
Ол үлегерлиг маргылдаага бистиң республикадан Анатолий Кара-Сал, Аяс Хертек, Омак Кара-Сал, Айдың Куулар киришкенин Буян Биче-оол дыңнаткан. Мөгелер баштай май 10-нуң хүнүнде грек-рим хүрешке хүрешкеннер. Түңнелинде 46-50 харлыг, С бөлүктүң, 88 килдиг мөгелерниң аразынга Омак Кара-Сал мөңгүн медальга база 56-60 харлыг, Е бөлүктүң мөгелериниң аразынга бистиң 71 харлыг хоочунувус Анатолий Кара-Сал 70 килге мөңгүн медальга төлептиг болганнар.
Хостуг хүрешке Омак Кара-Сал, Е бөлүктүң 88 килдиг мөгелер аразынга 1-ги черни ап, алдын медальга төлептиг болган. Хоочун мөге Анатолий Кара-Сал Е бөлүктүң 70 килге чедир 3-кү черни ап, хүлер медальды алган. 56-60 харлыг Е бөлүктүң 62 кил чедир мөгелер аразынга Аяс Хертек 3-кү черни ап, хүлер медальды алган.
Май 12-17 хүннеринде ол-ла залга Казахстанның Кубогу болур. Аңаа бистиң мөгевис Начын Куулар Шымкент хоорайның командазы дээш хүрежир болган. Тиилекчилер Азия база делегей чемпионадынга хүрежир эргени алыр деп дыңнаткан. Начынга спортчу чедиишкиннерни база чүгле тиилелгени күзедивис.
Алексей ЧАМБАЛ-ООЛ, спорттуң хоочуну.
“Шын” №18 2026 чылдың май 14
"Шын" солуннуң МАХ-каналынга каттыжыңар max.ru/join/egenQ...