Республикада «Чурттаарынга таарымчалыг хоорай хүрээлеңин хевирлээри» федералдыг төлевилел-биле 2025 чылда чаагайжыдар хөй-ниити девискээрлери дээш Тываның чурттакчылары бадылаашкынга киржип турар. Март 15-те, РФ-тиң Президентизиниң соңгулдазының бир дугаар хүнүнде, соңгулда участоктарынга ук төлевилелдиң бадылаашкынын база организастаан.
Тываның Баштыңы Владислав Ховалыг база ук төлевилелге катчып, хөй-ниити девискээрлерин чаагайжыдар бадылаашкынга киришкен. «Дыка хөй солун төлевилелдер бар-дыр. Мен тускай шериг операциязының киржикчилеринге тураскааткан төлевилел дээш соңгудум» — деп, Владислав Ховалыг чугаалаан.
Чаагайжыдар хөй-ниити девискээрлери дээш бадылаар пунктулар март 15-тен 17-ге чедир Тываның шупту кожууннарынга болгаш хоорайларынга ажылдаар. Ол пунктуларга волонтёрлар соңгуп келген чонга тайылбыр ажылын кылып, канчаар соңгуурун айтып берип, чон-биле ажылдаар.
Кызылдың 5 дугаар лицейинге бир дугаар соңгулда хүнүнде 9 волонтёр киржип келген. Оларны удуртуп турар 5 дугаар лицейниң айыыл чок чорук албанының эргелекчизи Елизавета Волобуева чорудуп турар ажылын тайылбырлаан: «Бистиң хоорайывыс моон-даа чараш болзун дээш, кижилер ол дээш соңгузун дээш, мында ажылдап турарывыс бо. Кызыл хоорайда чаагайжыдар 10 хөй-ниити девискээриниң кайы-бирээзин чурттакчы чон шилиир ужурлуг. Келген чон бо азып каан чуруктардан көргеш, сонуургаан объектизин шилээш, соңгуур. Канчаар соңгуурун билбес, ылаңгыя улуг назынныг кижилерге бо волонтёрлар дузалажып турар.
Чурттакчы чоннуң чамдыызы бо төлевилелди шуут билбес боор-дур. Ынчангаш тайылбыр ажылын ам-даа эки чорудар болза эки».
Ногаан жилеттерлиг планшеттер туткан волонтёр аныяк оолдар, кыстарның бирээзи эки турачы Күзел-оол Аракчаа волонтёр ажылында бир дугаар киржип келген. Ол Олимпийжи курлавырлар училищезиниң сургуулу. «Бөгүн эштерим-биле волонтёр ажылында киржип келдивис. Бо ажылга киржир бетинде баштай Аныяктар өргээзинге бисти өөредип, белеткеп турду. Ынчангаш кижилерге тайылбырлап, «Госуслуги» таварыштыр канчаар бадылаарын айтып бээрин эки билир мен. Чурттап турар хоорай, сууру чараш болзун дээш, чонну бо төлевилелге идепкейлиг киржирин кыйгырып тур мен» — деп, Күзел-оол чугаалаан.
Алдынай СОЯН белеткээн.
Авторнуң тырттырган чуруктары.
«Шын» №20 2024 чылдың март 16
