Хоруглуг арага садып-саарып турар 28 точка илерээн.

Тываның Баштыңы Владислав Ховалыгның бот-идепкейи-биле республикага сураглыг «Вайбер», «Телеграмм» мессенджерлерге хоруглуг арага садып-саарып турарының дугайында медээлээр «Идепкейлиг хамааты» деп чат-бот март айда эгелээн. Ооң техниктиг деткимчезин Тывада Регионну удуртур төп (ЦУР) хандырып турар, кирген дыңнадыгларның ажыл-чорудулгазын база ол төп чорудуп турар.

Айыттынган чат-боттар таварыштыр хамаатыларның киирген дыңнадыглары-биле март айның төнчүзүнден бо хүнге чедир хоруглуг алкоголь продукциязы садып турар 28 точканы, ооң иштинде 22 садыгны, 6 «адрести» илереткен. Шупту дыңнадыгларда хамаатыларның айыткан точкаларынче үнүүшкүннерни кылган түңнелинде административтиг хемчеглерни хүлээп алган.

Дараазында хуу сайгарлыкчыларга административтиг протоколдарны долдурган: Кызылдың солагай талакы эриинде дачаларда Дөгээ-Баары кудумчузунда «Сай» садыг, оң талакы эриинде дачаларда Магистральная кудумчузунда «Мое желание», Титова кудумчузунда «Наливали», «Дар» дача ниитилелинде «Алдын-Херел» садыглары; Чөөн-Хемчик кожууннуң Шеми сумузунда Ленин кудумчузунда «Ассорти» садыы (материалды судка дамчыткан).

Кызыл хоорайның Красноармейская 10-да «адресте» хоруглуг арага садып турганы илерээн, хынап чиндээн соонда спирт холумактыг 0,5 литрниң 9 пластик хаптыг шилди хавырган. Бии-Хем кожууннуң Аржаан суурда «Шанс» садыының ээзи хериминден водка садып турган. Шагаан-Арыгның «Абрикос» садыынга водка сады-саарып турганы илерээн, хыналда чоруп турар.

2023 чылдың эгезинден тура найысылалда «Обувь» болгаш «РПС» баазаларда хоруглуг спирт холумактыг продукция садып турарын чаңгыс эвес удаа илереткен, ол факт 22 четкен.

Хоойлу-дүрүм органнары садыг-саарылга фактыларының материалдарының кезик чамдыызын судче дамчыткан.

Хоруглуг арага-дары садып-саарып турарын хамаатылар тускай чат-боттарже дыңнадып болур http://t.me/aktivnyi_grazhdanin_bot «Телеграм» мессенджерде ажыттынган, шак-ла ындыг чат-бот «Вайберде» база бар — https://watbot.ru/w/o6t.

Дыңнадыг бүрүзү кичээнгей чок артпас дээрзин Тываның Баштыңы дыңнаткан: «Таварылга бүрүзүн мээң хайгааралым-биле ведомстволар аразының комиссиязынга сайгаргаш, хемчээн алыр бис. Дуза чедирер деп адаттынар, ооң аразында алкоголь садып-саарып турар черлерге удур оперативтиг хемчеглер чорударының дугайында саналды деткип тур мен. «Адрестер», барлар, кафелер хевирлиг хоойлуга удур садыглаашкын чорудуп турар точкаларны илередип тывар бис. Кеземчени шыңгыырадыр бис. Бир эвес ол хуу сайгарлыкчы болза, ооң бүдүрүлгезин хаарындан эгелээш, ажыл-агыйын кандыг-даа деткимче турбас кылдыр «кара даңзыже» кииреринге чедирер».

#Тывачазак #Тываныңидепкейлигхамаатызы #Чат_бот #Хоруглугарага #Кадыкшыл #Шынсолун #Тывадыл