Тывада «Россияга ажыл. Арга-шинектерниң үези» деп бирги Бүгү-россия ярмарказының регионалдыг чадазы болуп турар.
Бөгүн, апрель 14-те, Аныяктар өргээзинге 10 ажыг ажыл берикчилери Национал музей, “Тывахарылзааинформ” АН, “Тыва” КТРК, “Россети” АН, Тыва даг-руда компаниязы, Лунсин, “Восток” КХН, “Тардан Голд”, “Төпчүткен бухгалтерия” албан чери, ТР-ниң Өөредилге яамызы боттарының организацияларының дугайында баннер-медээлерни көскү черге чаңгыс аай кылдыр белеткеп, келген чонга ажылчын хостуг олуттар даңзызын таныштырган.
Чонну ажылга хаара тудар сорулгалыг чаа хевирниң Бүгү-россия ярмарказы бир дугаар болуп эртип турар. Ооң кол сорулгазы – ажыл дилеп турар хамаатыларны янзы-бүрү адырларның болгаш компанияларның ажыл берикчилери-биле каттыштырары. Ярмарканың киржикчилеринге элээн каш ажыл берикчилери-биле чугаалажып, регион иштинге болгаш Россияның янзы-бүрү булуңнарынга чедир ажылга тургустунуп болур аргаларны Чонну ажылга хаара тудар төп тургузуп турар.
Өөредилге яамызының дыңнадып турары-биле алырга, республиканың школаларында 270 ажыг башкылар хереглеттинип турар. Кызыл хоорайда эге класстар башкылары, кожууннарда англи дыл, физика, сан дээш өске-даа эртем башкылары чедишпейн турар. “Мээң башкым” губернатор төлевилели болгаш “Көдээ черниң башкызы” федералдыг программа-биле башкыларны школаларже хаара тудары көрдүнген.
Ярмаркага киржирде баш бурунгаар ажылга хаара туттунарының болгаш күш-ажылчы хамаарылгалар адырының “Россияга ажыл” деп Чаңгыс аай чурагайлыг платформазынга чагыгны киирер.
Ярмарка апрель 15-те Арбат шөлүнге уламчылаар.
А. Донгак
