Тываның Баштыңы Владислав Ховалыг соцчеткилерде блогу таварыштыр бодунуң хоорайы азы сууру чаартынарынга дузалажыр кылдыр кыйгырыгны регионнуң чурттакчыларынга кылган.
– Таарымчалыг хоорай хүрээлелин хевирлээри берге эвес. Ону кылырда https://clck.ru/34AeQ3 сайтыже киргеш, силерге таарышкан дизайн-төлевилел дээш үнүңерни бээр силер. Майның 31-ге чедир четтигер херек – деп, губернатор бадылаашкынның чурумун сагындырган.
Ол эң таарзынганы төлевилелдерни: Кызылда ТШО киржикчилери маадырларга паркты, Механизация биле Семирацкий кудумчулар белдиринде девискээрни, Кызыл кожууннуң Элегес-Аксы суурда аныяктар сесерлиин, Чаа-Хөл суурда дыштанылга сесерлиин адаан.
Удавас, Уруглар камгалалының хүнүнде, национал төлевилел боттанылгазы-биле Туранда чаагайжыттынган паркты байырлыы-биле ажыдар. «Бир дугаар көжүп келген орус чон парыгы» төлевилел 2018 чылда биче хоорайларга база төөгүлүг суурларга таарымчалыг хоорай хүрээлелин тургузар Бүгү-россияның тулган төлевилелдер мөөрейинге тиилээн. Бо чылын эрги хоорайның парк зоназын эде чаартыр улуг ажылдар доозулган.
Парктың девискээринде брусчатканы чадып, кудумчу чырыын киирип, бичии архитектура тураскаалдарын тургузуп, сандайлар, ойнаар черлерни, бок октаар саваларны тускайлаан. Оон аңгыда орус казанак база тыва өгнү тип, воркаут-шөлдү чаартып, хол бөмбүү болгаш футбол шөлдерин тудуп, дыштанылга зоназының төвүнде культура-массалыг хемчеглер эрттирер улуг сценаны белеткээн.
Бо чылын республиканың муниципалитеттери хөй-ниити шөлдерин чаагайжыдар бадылаашкынче 62 төлевилелди идип үндүрген. Бир эвес 51,5 муң хире кижи 30 хире төлевилелди бадылаптар болза, 2024 чылда ол кылдынар.
Бистиң корр.
"Шын" №38 2023 чылдың май 27