Чаңчыл ёзугаар грипп болгаш ОРВИ талазы-биле эпидемиологтуг сезон сентябрь 1-ден эгелей бээр. Ук аарыглардан камгаланыр эң кол арга – аңаа удур тарылга. Хөй-ниитиниң иммунитедин быжыглаары-биле республиканың чонунуң 60 хуузун тараан турар ужурлуг.
План ёзугаар аарыгның кончуг көдүрлүр үезинге чедир тарылга ажылдарын доозары чугула. Тарылга ажылдарының кайы хире чоруп турарының дугайында республиканың 1 дугаар эмнелгезиниң консультация-диагностиктиг поликлиниказының профилактика салбырының терапевт эмчизи Светлана Куулар дыңнаткан.
Август 29-туң хүнүнде поликлиникага 6000 “Совигрипп” болгаш 600 “Ультрикс” деп грипп болгаш ОРВИ-ге удур сыкыртыр эмнерни эккелген. Тарылганы, бирээде, бичии уругларга, сааттыг херээжен кижилер, улуг назылыг болгаш хоочу аарыгларлыг, ажыл-амыдыралының аайы-биле хөй кижилер-биле харылзажып турарларны тарыыры көрдүнген. Оларга башкылар, эмнелге, культура, садыг-саарылга ажылдакчылары болгаш өскелер-даа хамааржыр.
“Ультрикс вакциназын Совигриппке бодаарга, чымчак болганындан хоочу аарыглыг, кадыы кызыгаарлыг, сааттыг херээжен кижилерге болгаш пенсия назылыгларга салыр. Совигриппти үстүнде бөлүкче кирбейн турар кандыг-даа кижиге салып турар. Грипп болгаш ОРВИ-ге удур тарылганы салган соонда, хөй суксун ижер, доңуп болбас, 3 хонук дургузунда чунар-бажыңнап болбас” – деп, Светлана Куулар чугаалаан. Профилактика салбырының эмчилериниң демдеглеп турары-биле алырга, Совигрипп вакциназын чылдың-на салып турарындан организм аңаа чаңчыгып, тарылга соонда ажыл-амыдыралга шаптыктаар хире кандыг-даа демдектер тывылбас апарган.
Амгы үеде грипп болгаш ОРВИ-ге удур тарылга ажылдары барык адакталган. Ооң мурнунда чылдарга деңнээрге, бо чылын чурттакчы чон кончуг идепкейлиг тарыдып турар. Найысылал Кызылда албан черлериниң коллективтери профилактика салбырынче баш удур долгааш, боттарынга эптиг үени шилип, дугуржулганы кылып алырлар. Баш удур бижидилге ёзугаар эмчилер организацияның бодунга баргаш, ажылдакчыларны тарып турар. Чаңгыс хүн дургузунда 4-5 албан чериниң ажылдакчыларын чалалга ёзугаар тарып турарын терапевт эмчи демдеглээн.
Грипп болгаш ОРВИ-ге удур тарылганы алыр күзелдиг чон Щетинкин-Кравченко кудумчузунда поликлиниканың 3-кү каъдында 308 дугаар кабинетке кээп тарыдып алырын профилактика салбыры кыйгырып турар.
Аарыгны баш удур болдурбазы-биле дараазында нарын эвес дүрүмнерни сагыырын эмчилер сагындырып турар: холдарны үргүлчү чуур, хөй кижи чыылган черлер барбас, чурттап, ажылдап турар оран-савазын доктаамал агаарладыр, шын чемненир.
Чыжыргана СААЯ
Авторнуң тырттырган чуруу.
«Шын» №73 2023 чылдың сентябрь 27