Бөгүн, февраль 25-те, Тожу кожуунда “Ивижилер фестивалы-2023” кидин-түлүк эгелеп турар. Фестиваль чылдың-на Тоора-Хемден чадаг кижи чайлыг чедер делгем шөлде эрттип турар. Ында бо шакта кижи бажы кизирт, аът бажы козурт.
Организаторларның дыңнадып турары-биле, бо чылгы фестивальга Россияның өске регионнарындан төлээлерден аңгыда, Моолдуң ивижилериниң киржилгези манаттынып турар. Фестивальдың программазында солун хемчеглер хөй, оларның аразында эң-не көрүштүү - 300 метр хемчээлге иви чарыжы.
Фестивальды ивижилерниң нарын айтырыгларынга хамаарышкан “төгерик стол” ажыдар. 11 шактан тура фестиваль шөлүнге тожуларның ус-шеверлериниң алгы-кеш, иви мыйызы, сөөгү дээш өске-даа материалдардан даараан, чазаан кылыглары болгаш кат-чимис, эм оъттар, тоорук дээш оран кежиинден аъш-чемниң садыг-саарылгалыг делгелгези эгелээр. Ооң соонда Тожу кожууннуң албан организациялары, арбаннарының байырлыг чыскаалы болгаш фестивальдың кол хемчеглери эгелээр.
Ол хүн фестивальды ырак-чооктан сонуургап келген чон аныяк тожуларның өг-бүле туткан чараш байырлалының херечилери болур. Ол ышкаш “Ыраажы ивижи” мөөрейниң шилиндектериниң ыры-шоору, кожууннуң чогаадыкчы коллективтериниң солун концерт, оюн-тоглаазы чыылганнарга аян тудар.
База бир көрүлделиг мөөрей -“Тожунуң тос чадыры”. Ол ышкаш ивиниң дерилгези, ону дүрген эзертээринден аңгыда, ону мунуп чоруур ивижиниң кеткен хеви, эдилелдеринге база мөөрейлежир. Ол-ла хемчеглер аразында база бир солун мөөрей- аңчылар хаагынга (кеш-биле шап каан хаак) чарыш, чудук хирээлээринге база токпак чарарынга, ча адарынга маргылдаалар дээш өске-даа солун хемчеглер бөгүн болур.
Ивижилер фестивалы эгелээн.
25 февраля 2023
32