Келир үе бүзүрелдиг
Уруглар камгалалының хүнүнде найысылалдың “Хүреш” стадионунга 2008–2018 чылдарда төрүттүнген бичии болгаш элээди мөгелер аразынга республика чергелиг тыва национал хүреш маргылдаазы болуп эрткен. Аңаа бүгү Тывадан 5 хардан 16 харга чедир 859 мөге ачыр-дачыр хүрешкен.
Маргылдааны Тываның Баштыңы Владислав Ховалыг база сонуургап четкен. Ол бичии мөгелерге байыр чедирип тура, Тываның чурттакчыларынга хүреш аргаларының ажык-дузазын демдеглээн. Тайга-таскылга мажаалай халдап келзе, хүрешти билир кижи оон чайлай берип болур. Ол ышкаш Ада-чурт дайынының үезинде Тыва Арат Республиканың эрес-дидим эки турачыларынга база хүреш аргалары-биле камгаланып чорааны билдингир дээрзин В. Ховалыг чугаалаан. Амгы үеде тускай шериг операциязының киржикчилеринге база хүреш ажык-дузалыг болуп турар.
Чаа өзүп олурар мөгелер аразындан келир үеде Тыва Республиканың Начын, Хартыга, Арзылаң, Чаан, Күчүтен мөгелери үнер дээрзин Владислав Ховалыг бүзүрелдии-биле демдеглээн. «Тыва спортчулар аразындан Россияның чемпионнары болгаш чоргааралдары кара чажындан хүрежип өзүп келген болгай. Олар амгы үеде муң-муң чаштарга үлегерин көргүзүп, чаңгыс чер чурттугларывыстың бүзүрелин болгаш хүндүткелин чаалап алганнар» — деп, бичии мөгелерге чагыын берген.
«Россияның күжү» Бүгү-россия чергелиг спортчу марафонну Чаңгыс демниг Россия июнь 1-ден эгелеп эрттирип эгелээр дугайында Тываның удуртукчузу дыңнаткан. Ооң оргкомитедин ат-сураглыг мөге Александр Карелин удуртуп турар. Ук төлевилел дузазы-биле чайгы үеде Тываның билдингир спортчулары уругларга болгаш аныяктарга эртенги сула-шимчээшкиннерни, мастер-класстарны эрттирип, олар-биле кады ГТО нормаларын дужаап, киржир. Ооң кол сорулгазы – спортчу болгаш кадык амыдыралче хөй кижини хаара тудары. Чаш болгаш элээди мөгелерни, оларның ада-иелерин болгаш кырган ава-ачаларын Тываның Баштыңы ук төлевилелге идепкейлиг киржиринче кыйгырган.
— Хүндүлүг оолдар, мөгелер, силерге чоргаарланып чоруур бис. Силерниң эртем-билигге, өөредилгеге, спортчу база чогаадыкчы чедиишкиннериңерге өндүр улуг чуртувус Россияның болгаш төрээн Тывавыстың келир үезин депшидип, сайзырадыр дээрзинге бүзүрээр бис — деп, В. Ховалыг түңнээн.
Алиса ДОНГАК.
Буян ООРЖАКТЫҢ тырттырган чуруктары.
"Шын" №40 2023 чылдың июнь 3
