Тываның ортумак профессионал өөредилге системазында күрүне шылгалдалары эгелээн. Чижээ, Тываның көдээ ажыл-агый техникумунуң сургуулдары шылгалдаларның практиктиг чадазын дужаап турарлар.
Шылгалдаларда көдээ ажыл-агый адырында эң-не хереглелдиг мергежилдерге өөренген суургулдар киржип турар. Сургуулдарга шылгалда дужаарынга шын бүдүрүлгелерде ышкаш шупту таарымчалыг байдалды тургускан. Шылгалдаларның киржикчилери мергежилиниң аайы-биле практиктиг онаалгаларны күүседип, ажылының технологтуг чорудулгазын сагывышаан, организастыын көргүскеннер.
«Мал продукциязының технологиязы» мергежилдиң сургуулдары чиг этти болбаазырадырының арга-мергежилдерин, шынарының хыналдазын, продукцияның айыыл чогун база техниктиг дериг-херекселдер-биле ажылдап билирин көргүскен.
«Көдээ ажыл-агый техниказын болгаш дериг-херекселин ажыглаары болгаш септээри» деп мергежилге өөренип алган сургуулдар — келир үениң механиктери айыыл чок чоруктуң шупту нормаларын сагывышаан, машиналарның диагностиказын, таарыштырарын база септээр ажылдарын кылганнар.
«Сад, парк болгаш ландшафт тудуу» мергежилдиң доозукчулары девискээрлер чаагайжыдылгазы, ногаанчыдылга база биче архитектурлуг дүрзүлер талазы-биле төлевилелдерин таныштырган.
Малды чемгерер, тудар база өстүрер, ол ышкаш мал чеминиң шынарын хынаар талазы-биле билиглерин «Зоотехния» мергежилиниң сургуулдары көргүскен.
Бо шылгалдаларны чедиишкинниг дужаары доозукчуларга чүгле арга-мергежилин чөптүг үнелээри эвес, а херек кадрлар регионнуң баазазынче кирер аргалыг болур. Шылгалдаларның түңнелинде дыка хөй ажыл берикчилери хостуг ажылдарны сүмелээринге белен. Ол чүүл техникум сургуулдарының белеткелиниң бедик деңнелдиин бадыткап турар.
/ А. СОЯН белеткээн.
Медээни болгаш чуруктарны ТР-ниң Өөредилге яамызының соцчеткиде арнындан алган.
“Шын” №24 2026 чылдың июнь 25
"Шын" солуннуң МАХ-каналынга каттыжыңар: max.ru/join/egenQ...