«Көдээ черниң башкызы» деп программа-биле Чөөн-Хемчик, Өвүр, Бии-Хем, Сүт-Хөл, Улуг-Хем, Эрзин, Тожу болгаш Мөңгүн-Тайга кожууннарже сентябрь 1-де математика, физика, англи дыл, химия, орус дыл болгаш литература эртемнериниң база эге класстар башкылары ажылдап эгелээр.
Бо хүнде Тыва Республиканың Өөредилге яамызында көдээ черлерге ажылдаар башкылар-биле үш таланың дугуржулгазынга ат салыр ажылдар чоруп турар.
2023 чылда «Көдээ черниң башкызы» порталда шилилге мөөрейге киржири-биле 82 билдириишкин кирген, оларның 35-жи бадыткаттынган. Мөөрей комиссиязының түңнээни-биле, рейтинг талазы-биле 8 тиилекчиниң баллдары эң-не хөй болган, олар 1 млн рубль түңнүг төлевирни алырлар.
«Чаа өөредилге чылы-биле, коллегаларга байырымны чедирдим. Манап турар школаларынга оларның ажыл-ижи эгелээр. «Көдээ черниң башкызы» төлевилелге киришкеш, дыка шын базымны кылдыңар. Ажыл-ижиңерге улуг-улуг чедиишкиннерни күзедим» — деп, ТР-ниң өөредилге сайыды Елена Хардикова чугаалаан.
2020 чылдан тура Тыва Республикада көдээ черлерже башкыларны хаара тудар сорулга-биле «Көдээ черниң башкызы» деп программа боттанып турар. Ук төлевилелдиң ажылдап эгелээн үезинден тура көдээ черлерде болгаш 50 муң четпес санныг чурттакчылыг бичии хоорайларда 41 башкы ажылдап турар. Ам оларның одуруунда 8 башкы немешкен.
Бистиң корр.