Тываның Баштыңы Владислав Ховалыг найысылал Москвада ажыл-херекчи сургакчылаашкынның үезинде Россияның көдээ ажыл-агый сайыды-биле ужурашкан.
''Тывага мал ажылының улуг ужур-дузалыг болуп турарын чугулалап көргеш, хары угда элээн каш угланыышкыннарга ажылды чорудуп тур бис. Ол болза мал чеми болур культуралар тарып өстүрер шөлдерни калбартыры, суггарылга системаларын дагын тургузары болгаш сайзырадыры, халдавырлыг мал аарыгларын болдурбас таарымчалыг байдалды кадагалап арттырары.
Көдээ ажыл-агый бүдүрүлгезинде чугула сорулгалар дугайында бо хүн Россияның көдээ ажыл-агый сайыды Д.Н. Патрушев-биле чугаалаштывыс - деп, Владислав Ховалыг бодунуң социал четкилерде арыннарынга бижээн. - Сайыт бистиң ажыл-чорудулгавысты чогумчалыг кылдыр үнелеп көрдү. Чижээ, мал өстүрер ажылдың сайзыралының дугайында чугаалап тура, Дмитрий Николаевич эрткен чылдың түңнелдери-биле эът бүдүрер угланыышкында өзүлдени демдегледи.
Чүгле амгы үеде боттандырып турар планнарывысты эвес, 2024 чылче чагыглар киирер кампанияны сайгарып чугаалажыры биске чугула турган. Ынчангаш ''Кыжын тергең белетке, шанааң чайын белетке'' деп үлегер домакта дег, ужуражылга үезинде чаа эгелээшкин-сорулгаларывыстың дугайында чугааладывыс (малчын аалдарның электрижидилгези, ховар болгаш чидип бар чыдар малдың баш санын кадагалап арттырары д.о.ө.) Саң-хөө хандырылгаже кирери-биле чагыглар киирериниң, оларны камгалаарының онзагайларын чугаалаштывыс''.
Көдээ девискээрлерниң комплекстиг хөгжүлдезиниң программазын боттандырарынга таарымчалыг байдалдар база ажыттынып турар дээрзин Тываның Баштыңы медеглээн.
''Бо чылын 130 млн хире рубль акшаны мөөңнээр бис. 2022 чылда үндүрген саң-хөө хандырылганы эки шиңгээдип алганывыс ачызында федералдыг бюджеттен лимитти биске улгаттырган. Ук акшаның барык чартык кезии бистиң суурларывыстың овур-хевирин чаартырынче үнер. Социал инфраструктураны экижидер бис. Чижээ, Эрзинниң Нарын суурунга чаа ясли олуттары тургустунар. Суурга чугула херек болуп турар специалистер - башкылар биле эмчилерге бажыңнар тударын база планнап турар бис'' - деп, Владислав Ховалыг дыңнаткан.
И.Санчат белеткээн.
