2025-2026 өөредилге чылында республиканың кожууннарының культура албан черлеринде федералдыг чаа программа-биле 13 бедик мергежилдиг специалистер немешкен.
Сагындырып каар чүүл – “Көдээниң культура ажылдакчызы” программаны 2025 чылда Россияның Президентизиниң эгелээшкини-биле боттандырып эгелээн. Бо программа мурнуку чылдарда “Көдээниң башкызы”, “Көдээниң эмчизи” деп чедиишкинниг боттандырып турар төлевилелдерниң уланчызы болуп турар.
2025 чылдың август 27-де ТР-ниң Культура яамызынга “Көдээниң культура ажылдакчызы” программаның тиилекчилери-биле үш таланың – ТР-ниң Культура яамызы, кожууннуң культура эргелелиниң удуртукчузу болур ажыл берикчизи болгаш программа киржикчизиниң аразында керээзин чарган соонда, сентябрь 1-ден эгелеп шупту ажылдаар олуттарында бедик хей-аът көдүрлүүшкүннүг ажылдап эгелээн дугайында “Шын” солуннуң 37 дугаарлыг үндүрүлгезинге 2025 чылдың сентябрь 25-те бижээн бис.
2026 чылдың май 21-де ТР-ниң Культура яамызынга “Көдээниң культура ажылдакчызы” төлевилелдиң киржикчилериниң кылган ажылының отчёдун дыңнаан. Хуралды культура сайыдының оралакчызы Вера Кошкар-оол башкарып эрттирген.
Республиканың аңгы-аңгы булуңнарынга чаа программа ёзугаар ажылдаан көдээниң культура ажылдакчылары 9 айда кылып чоруткан ажылын таныштыргаш, арга-дуржулгазын солчуп, чедиишкиннери болгаш кандыг бергедээшкиннерге таваржып турганын чугаалааннар.
Специалист бүрүзү боттандырган төлевилелдериниң, чаа эгелээшкиннер болгаш кожууннуң культурлуг амыдыралынга киирген үлүг-хуузунуң дугайында тодаргай илеткелдерни кылган.
Оралакчы сайыт Вера Александровна оларга моон-даа соңгаар эгелеп алган ажылын улам күштелдирип, чаа-чаа бедиктерже чүткүп ажылдаарын күзээн. Ол ышкаш көдээниң культура ажылдакчыларының мурнунда ам-даа кылыр ажыл хөй болганда, тура дүшпейн, чаа-чаа төлевилелдерни дидим боттандырып ажылдаары күзенчиг дээрзин оралакчы сайыт демдеглээн.
Болган хуралга программаның боттанылгазының баштайгы түңнелдерин үндүрген. Ылаңгыя Чаа-Хөл кожууннуң көдээ культура бажыңында бот-тывынгыр театрның режиссёру Сайсуу Кууларның дуржулгазын онзалап демдеглээн. 9 ай дургузунда олар хөй мөөрейлерниң тиилекчилери, лауреаттары болуп, ниити шаңнал фондузун 200 муң рубль чедир көвүдеткенин чыылганнарга дыңнаткан.
Ол ышкаш Таңдының төп ном саңының Балгазында салбырының эргелекчизи Сайлык Тулуштуң ажылын багай эвес деп демдеглээн. Ол модельдиг ном саңын тургузар сорулгалыг “Өг-бүле” национал төлевилелдиң “Өг-бүле ыдыктары болгаш культура инфраструктуразы” федералдыг программага киржири-биле бүгү документилерни белеткеп алганын таныштырган.
“Көдээниң культура ажылдакчызы” программа республикага дыка ажыктыг болуп турарын, чүгле кадрлар айтырыын шиитпирлээринден аңгыда, көдээ черлерге культураны хөгжүдеринге улуг идиг болуп, аныяктарны ынаар хаара тудуп деткииринге, ёзу-чаңчылдарны кадагалап арттырарынга дузалыг дээрзин хурал киржикчилери бир үн-биле демдеглээннер.
2025 чылда “Көдээ культура ажылдакчызы” программа-биле 13 специалист ажылдап эгелээн болза, бо чылын 27 специалисти Тываның 11 кожуунунче ажылдадып чорудар дээн.
/ К. МОНГУШ.
Чуруктар болгаш медээни ТР-ниң Культура яамызының социал четкиде арнындан алган.
“Шын” №20 2026 чылдың май 28
"Шын" солуннуң МАХ-каналынга каттыжыңар: max.ru/join/egenQ...