Бир оол орукка кылаштап чорааш, көпеек тып алган. «Көпеек база акша-дыр!» деп ол бодангаш, акша хавынче суп алган. Оон ол: «Бир эвес муң акша тып алган болзумза, чүнү канчаар мен? Авам, ачамга белектер садып бээр ийик мен!» деп бодаптарга, акшазының хавы шала аартай берген ышкаш болган. Оол көрүптерге ында — муң рубль! «Хөктүг чүве-дир аа? Чаңгыс көпеек тургаш, ам муң акша!» деп, оол кайгап боданган.
«А бир эвес он муң рубль тып алган болзумза? Саар инек саткаш, ооң сүдү-биле ада-иемни чемгерер ийик мен» деп бодаптары-биле, акшазының хавынга он муң рубль немежи берген. Элдепейлиг!
Оол амырап: «Чүс муңнуг болзумза, бажың саткаш, кадайлангаш, бажыңымга кырганнарымны чурттадып алыр ийик мен!» деп бодапкаш, акшазының хавын дыка дүрген ажыдып көрген. Ылап-ла ында чүс муң рубль чыткан!
Ол ам боданып эгелээн: «Чаа бажыңымче азы ада-иемни албас чоор бе? Канчап билир кадайымга таарышпаза? Эрги бажыңынга чурттап олургайлар-ла. Инек тудары база түвектиг-дир, ооң орнунга өшкү садып алыр мен. Хөй белектер-даа сатпас мен, чарыгдалы хөй-дүр…».
Хенертен акшазының хавы дыка чиик апарганын ол эскерипкен. Корткаш, ажыдыпкаш көрген — көпеек чааскаанзырай берген чыткан …
Эң-не хөй байлак — акша хавында эвес, а буянныг чүректе.
«Шын» №46 2024 чылдың июнь 22
