Апрель 4-те В.М. Халилов аттыг Тываның күрүне филармониязының 56 харлаанынга тураскааткан чараш концерт болуп эрткен. Концерттиң байырлыг кезээнде хөй чылдар дургузунда филармонияда ак сеткилдиг үре-түңнелдиг ажылдап чоруур артистеринге, хөгжүмчүлеринге болгаш ажылдакчыларынга шаңнал-макталдарны тывыскан.
ТР-ниң Чазак Даргазының Өөрүп четтириишкин бижиин филармонияның редактору Уйнук-оол Домбай-оолга Тываның культура сайыдының бирги оралакчызы Людмила Сат тывыскан.
ТР-ниң Дээди Хуралының (парламентизиниң) Даргазының мурнундан Хүндүлел бижикти филармонияның хоочун кассири Светлана Сааяга, Өөрүп четтириишкин бижиин депутат Начын Чамбалдоо дараазында хөгжүмчүлер: Артыш Ооржакка, Геннадий Сааяга, Хүлер Лопсанга, Чодураа Монгушка, Сайлык Ламажапка тывыскан.
Концертке филармонияның бүгү чогаадыкчы коллективтери, хөйге билдингир ат-сураглыг болгаш аныяк солистери Эльвира Докулак, Софья Кара-оол-Дулуш, Дамырак Монгуш, Экер Кара-Сал, Белек Бавуу, Дамырак Сюрюн, Елена Куулар, Алия Ондар, “Аян” ыры-хөгжүм ансамбли, орус улустуң хөгжүм оркестри (АРНИ), “КАНТ” ансамбли боттарының чараш оюн-көргүзүү-биле көрүкчүлерин база катап магадаткан.
Болган концертке даштыкы, россий болгаш тыва композиторларның хөйге билдингир хөгжүм чогаалдарын дириг хөгжүмге үдеп күүсеткенин чыылганнар сонуургап, изиг-изиг адыш часкаашкыннарын харам чокка сөңнеп турганнар.
Бистиң корр.
Чурукту интернеттен алган.
“Шын” №13 2025 чылдың апрель 10
