Бии-Хем кожууннуң Өөк сумузунуң амыдыралында кол черни ээлеп турар оран-саваның бирээзи — школа. Бо хүнде өөредилге черинде ниитизи-биле 124 школачы хаара туттунган. Школада ниитизи-биле 20 башкы ажылдап турар. Оларның барык сезен хуузу ук школаның доозукчулары. Уруглар алды хонуктуң дургузунда эртенги шакта өөренгеш, дүъш соонда аңгы-аңгы бөлгүмнерде хаара туттунган.
Өөк сумузунуң Василий Ян аттыг ортумак школазының директору Алена Данчыттың медеглээни-биле алырга, Өөредилге яамызының «Өзүлдениң точказы» деп амгы үениң школазының дериг-херекселин алгаш, бо хүннерде идепкейлиг ажыглап турар.
Школаның чедиишкиннери хөй. 2020 чылда республиканың 20 тергиин школаларының аразынче кирген. Өөредилге черинде полицияның чалыы өңнүктери, юнармейжилер бөлүктерин ажыткан болгаш, патриотчу кижизидилге талазы-биле корум-чурум үрээшкиннери илереттинмээн.
Доозукчу 9-ку класста чеди, а 11-ги класста алды уруглар, оолдар бо 2023–2024 өөредилге чылында күрүне шылгалдаларынга белеткенип, консультацияларны доктаамал эрттирип турар. Школаны дооскаш, колдуунда дээди өөредилге чериниң юридиктиг угланыышкынын оолдар, уруглар шилип алган.
Бүгү Тываның школаларында 28 муң ажыг өөреникчилерни изиг чем-биле хандырып турар. Оларның аразынче Өөк сумузунуң Василий Ян аттыг ортумак школазының эге класстың 54 өөреникчизи база кирип турар. Росхереглелхайгааралдың негелдезиниң аайы-биле 12 хонуктуң менюзун баш удур тургускан. Меню езугаар чаштарны халас изиг чем-биле чемгерип турар.
Өөк сумузунуң школазы 1970 чылда туттунган. 2001 чылда Бии-Хем кожууннуң чагырга даргазының доктаалы езугаар билдингир башкы Василий Янның ады-биле ук школаны адаан. Уругларны тыва дылга хандыр өөредир талазы-биле чедиишкинниг школаларның бирээзи. Төрээн дылды өөредири-биле, немей беш шакты кииргени – ооң бадыткалы.
Бистиң корр.
«Шын» №87 2023 чылдың ноябрь 15
