Тускай шериг операциязының киржикчилеринге болгаш оларның өг-бүлелеринге деткимче көргүзер “Ада-чурттуң камгалакчылары” күрүне фондузунуң регионалдыг салбыры Тыва Республиканың Нотариалдыг палатазы-биле кады ажылдажылганы эгелээн. Ооң дугайында дугуржулгага хамаарышкан организацияларның удуртукчулары Мерген Кызыл-оол биле Марианна Иргит олар ат салганнар.
Дугуржулга езугаар ТШО-нуң хоочуннарынга болгаш оларның өг-бүлелеринге халас юридиктиг дузаны бедик мергежилдиг специалистер чедирер.
Ындыг халас юридиктиг сүмени Күрүне фондузунуң салбырының офистеринге, а ол ышкаш републиканың чурттакчыларынга халас юридиктиг дуза чедирер черлерге ап болур. Ол ышкаш талалар медээ солчулгазының дугайында дугурушканнар.
Фондунуң регионалдыг салбыры дыка хөй айтырыгларның талазы-биле Бүгү-россияның “Дайынчы акы-дуңмалашкы” хөй-ниити организациязы-биле, а ол ышкаш Тыва Республиканың кижиниң эрге-ажыктарын камгалаар талазы-биле төлээзи Александр Адыгбай-биле кады ажылдажыр. Оон аңгыда салбыр Ада-чурт камгалакчыларының өг-бүлелериниң комитедин, тускай шериг операциязының киржикчилеринге болгаш оларның өг-бүлелеринге деткимче көргүзер республика штавын хаара туткан.
Бир ай ажылдаан үениң дургузунда безин фондунуң салбыры 350 ажыг өргүүделдерни ажылдап кылган. Дайынчы хөделиишкиннерниң хоочуннарынга болгаш оларның өг-бүлелеринге социал төлевирлерни санаарының, уругларны школа назыны четпээн черлерге, Кызылдың школаларының бирги класстарынга тургузарының, эм шынарлыг Дус-Хөлге болгаш “Серебрянка” санаторий-профилакторийге эмнээшкин чазалгазының талазы-биле документилерни долдурарынга дузаны каткан.
/ А. ХЕРТЕК белеткээн.