Май 23-те Тывага улуг орук озал-ондаа болган – Кызыл кожууннуң Баян-Кол суурдан ырак эвесте черге, үш автомашина үскүлешкенинден, алды кижи амы-тынындан чарылган.
Майның 23-те 21.40 минута турда, Тыва Республикада ИХЯ Күрүне автоинспекциязының орук-патруль албанының аңгы ротазының дежурный бөлүүнче айыыл-халаптың дугайында медээ кирген.
Р-257 «Енисей» автооруктуң 858-ки километринге авария болган. Алды кижи – беш херээжен база бир эр кижи ол-ла черинге чок болган, берге байдалдыг ийи эр кижини республиканың 1 дугаар эмнелгезинде чыттырган, оларның амы-тыны дээш эмчилер демисежип турар.
Тываның Баштыңы Владислав Ховалыг социал четкилерде бодунуң арынында аварияның дугайында дыңнадып, ында оперативтиг шупту албан черлери чеде берген, орук озал-ондааның чылдагаанын, машиналарга чораан кижилерни тодарадыр дээш ажылдап турарын дыңнаткан.
"Чугула дузаламчыны база деткимчени көргүзер даалганы Чазактың социал адырынга бердим. Баш бурунгаар медээ-биле алырга, чок болган улус шупту ортумак назылыг кижилер болуп турар. Кым-бир кижиниң авалары, ачалары, кончуг күш үезинде кижилер. Мөчээн улустуң төрээн болгаш чоок кижилеринге ханы кажыыдалды илереттим" – деп, Ховалыг дыңнаткан.
Тываның ИХЯ истелге-оперативтиг бөлүү орук озал-ондааның канчаар болганын тодарадып турар.