Тес-Хем кожууннуң төп эмнелгезиниң бичии уруглар поликлиниказының септелгезин, Бии-Хемниң Хүт суурда фельдшер-акушер пунктузунуң тудуун келир чылын кылыр деп планнап турган. Ынчалза-даа Федералдыг кадык камгалал яамызының шиитпирлээни ёзугаар ооң акшаландырыышкынын бо чылын мурнай чорудуп берген.
Россияның кадык камгалал яамызының шак ындыг шиитпириниң ачызында көдээ суурларның социал инфраструктуразын чаартыр байдал тургустунуп келген. Тываның Баштыңы ук ведомствога өөрүп четтиргенин илереткен. Тес-Хем кожуунда уруглар поликлиниказының септелгезин, Бии-Хемниң Хүт суурда фельдшер-акушер пунктузунуң тудуун бо чылын дораан эгелей берген.
Оон аңгыда, Бии-Хемниң Шивилигде, Өвүрнүң Чаа-Суурда, Тожунуң Сыстыг-Хемде, Тес-Хемниң Бедир-Арыгда, Каа-Хемниң Бүрен-Аксыда, Таңдының Успенкада чаа ФАП-ны, Эрзинниң Мөрен суурда амбулаторлуг эмнелгени тудуп турар.
Успенка суурда ФАП тудуу доозулган, ук объектиниң документилерин кылып турар. Амгы үениң медицина дерилгези-биле шиметтинген чырык болгаш чылыг, чараш чаа фельдшер-акушер пунткузу Успенка суурнуң 400 чурттакчызынга , ооң иштинде 150 бичии уругларга, баштайгы эмчи дузазының хандырылгаларын чедирер.
Акшаландырыышкынын мурнадырының дугайында шиитпири республиканың баштайгы эмчи дузазы чедирер албан черлерин чаартырының программазын боттандырарынга эки үре-түңнелдиг болуп келген. «Кадык камгалалы» национал төлевилелдиң күрүне программазынга эрткен чылын киришкеш, республика үш ФАП, үш амбулаторлуг эмнелгени тудуп алган. Бо сөөлгү үш чыл дургузунда Тываның суурларынга 37 фельдшер-акушер пунктуларын болгаш беш амбулаторлуг эмнелгелер туттунган. Ук программа 2025 чылда доостур. Тывага шупту 11 амбулаторияны, 32 фельдшер-акушер пунктуларын болгаш ниити эмнээшкинниң беш офизин тудуп кылыр ужурлуг.
ТР-ниң Чазааның медээлерниден Р.Демчик белеткээн.