Март 28-те Тываныӊ күрүне университединиӊ башкылавас мергежилдиг доозукчуларныӊ ниити ажыл хуваалдазы болуп эрткен. Ажыл хуваалдазыныӊ хемчээнге хоойлу, тѳѳгү, экономика, кѳдээ ажыл-агый болгаш инженер-техниктиг факультеттерден ниитизи-биле 175 студент киришкен.
Ажыл хуваалдазыныӊ хемчээнге Тываныӊ Орук-транспорт, тудуг, Юстиция, Иштики херектер, Арга-арыг ажыл-агыйы болгаш бойдус курлавырлар, Кѳдээ ажыл-агый болгаш аъш-чем яамылары база прокуратураныӊ, күрүнениӊ болгаш тус чер албаннарыныӊ ажыл берикчилери киришкен. Оон аӊгыда, ТывКУ-нуӊ ажыл хуваалдазынга “Лунсин” КХН-ниӊ, Тываныӊ бойдус парыгыныӊ, Кызылдыӊ керээ-биле шериг албаны эрттирер шилилге пунктузунуӊ, Тывада Россияныӊ Федералдыг Айыыл чок албаныныӊ эргелелиниӊ тѳлээлери кээп киришкен.
Ажыл хуваалдазыныӊ түӊнелинде, чамдык доозукчулар магистратурага өөренирин күзээннер. Кезек аныяк оолдар ѳѳредилге соонда Россияныӊ Чепсектиг Күштеринге шериг албанын эрттирерин планнап турар. Доозукчуларныӊ хѳй кезии келир үеде ажылдаар олудун шилип алганнар.
Ажыл берикчилери аныяк тускай мергежилдиглерни Тываныӊ кожууннарынга болгаш найысылалга ажылга хүлээп алыр күзелин илереткеннер.
ТывКУ-нуӊ медээлеринден.
«Шын» №25 2024 чылдың апрель 3
