Чоокта чаа "Khoomei Beat" тыва этно-поп хөгжүм бөлүү Russian World Music Awards 2024 деп алдарлыг Российжи этниктиг хөгжүмнүң шаңналынга World Music-тиң эң-не тергиин төлевилели кылдыр демдеглеттинген.
Бо чылдың мөөрейи Россияның “Дикая мята”, WAFest дээн ышкаш улуг фестивальдарының продюсерлеринден болгаш Италиядан, Мурнуу Кореядан билдингир фестивальдар арт-директорларындан тургустунган арга-дуржулгалыг жюри кежигүннерин чыгган. Оларның аразында бүдүн делегейде гастрольдап чоруур World Music хевириниң хөгжүмчүзү кылдыр сурагжаан Радик Тюлюш база бар.
"Khoomei Beat" бо бедик шаңналды алганынга өөрүп, “Бистиң чогаадыкчы чоруувусту бедик үнелээни дээш организакчыларга болгаш шииткекчилерге улуу-биле өөрүп четтирдивис. Ол бисти улаштыр хөгжүм чогаадырынга болгаш өгбелеривистиң биске арттырып берген кайгамчыктыг тыва ыры-хөгжүмүн делегей-биле үлежиринче улам сорук киирип, чалгынналдырып турар” деп, боттарының сагыш-сеткили-биле үлешкен.
