Республиканың Баштыңы Владислав Ховалыг Хамааты камгалалының болгаш онза байдалдар албанынга чер-черлерде чагырга черлери-биле кады хемнер, хөлдерге дыштанып келгеннерге айыыл чок байдалдарны тургузарын дааскан. Ук даалгага Туризм талазы-биле агентилел база каттыжып, туризм объектилериниң инфраструктураларын хөгжүдеринге сонуургалдыг болур ужурлуг. Ол ышкаш чер суму бүрүзүнде чагырга черлериниң удуртукчуларындан хемнер, хөлдерге кижилерниң амы-тынының камгалалын күштелдирерин негээн.
Сугда эжинген кижилерниң айыыл чок чоруунче онза кичээңгейни салырын Республиканың чурттакчылары социал четкилерде бижип турар дээрзин Владислав Ховалыг айыткан. Дыштанылганың чамдык черлеринде, ылаңгыя Тере-Хөлде турбаазада, эштир болгаш камгалал дериг-херекселдери, бирги дузаның аптечкалары чок дээрзин ук дыңнадыгларда айтып турар. Хамаатыларның сугга айыыл чок чоруунуң айтырыы чүнүң-даа мурнунда тус-тус чагырга черлеринге онаажыр дээрзин ол сагындырган.
Россияның Онза байдалдар амызының Тыва Республика талазы-биле кол эргелелиниң сан-медээзинден алырга, 2023 чылдың март айындан бээр үеде сугларга 13 озал-ондак бүрүткеттинген, ооң түңнелинде тос кижи амы-тынындан чарылган, бир кижини камгалап алган, ийи кижи ис чок читкен. Мырыңай бо хүннерде, июль 16-да, Кызыл хоорайга эзирик аныяк оол сугга дүжүп өлген.
Ол ышкаш Онза байдалдар яамызының кол эргелелиниң дыңнатканы-биле алырга, ада-иелериниң хайгааралы чокка уруг-дарыгның сугга эштир, ооң уламындан өлүп-когараар таварылгалары уламчылавышаан. Сөөлгү шак ындыг таварылга Улуг-Хем кожууннуң Хайыракан суурунга бүрүткеттинген. 6 болгаш 12 харлыг назы четпээн уруглар септи кежир эштип чорда, оларның бирээзи сугга дүшкен. Сөөлүнде ооң өлүг мөчүзүн сугдан ужулган.
Сугга озал-ондакты болдурбазы-биле Россияның Онза байдалдар яамызының Тыва Республика талазы-биле кол эргелели эзирик эжингеннерге хамаарыштыр торгаалдарның хемчээлин улгаттырарын саналдаан. Амгы үеде ук торгаалдарның хемчээли 100-тен 500 рубль чедир.
"Шын" №53, 2023 чылдың июль 19