Республиканыӊ социал ажылдакчылары биле эмчилерниӊ каттышкан мобильдиг бригадалары кожуун бүрүзүнде ажылдап турар.
Олар 2022 чылда 1536 кижиге боттуг дузаны чедирген. Чедери берге ырак суурларда чурттап турар 65 хардан өрү назылыг улустуӊ одаар ыяш-дажыныӊ, аъш-чемин, идик-хевиниӊ хандырылгазын четчелеп көрбүшаан, кадыыныӊ байдалын шинчилеп турар. Чижээ, Эрзин кожууннуӊ мобильдиг бригадазы Нарын суурда бажыӊында аарып чыдар сес кижиге эмчиниӊ доктаамал хайгааралы херек дээрзин билир. Бажыӊындан үнүп болбас аарыг улуска барып чедип, анализтерин ап, кадык байдалын шинчилээн.
«Улуг салгал» деп федералдыг төлевилелдиӊ, «Демография» национал төлевилелдиӊ шугуму-биле мобильдиг бригадалар 2023 чылда ажылын уламчылаар.
Р. ДЕМЧИК белеткээн.
