Үлегерлиг «Эзир-Кара»
Самагалдайның Симчит Авый-оол аттыг уругларның уран чүүл школазының үлегерлиг «Эзир-Кара» бөлүү Кыдаттың найысылалы Пекинде Тывазын төлээлеп чеде берген. Оларны ук школаның директору, ТР-ниң культуразының алдарлыг ажылдакчызы Чинара Сандак биле хореограф башкызы Үгер Ликсок эдертип чоруур.
Улуг мөөрейге салым-чаяанныг чалыы самчылар төрээн Тес-Хем кожуунун болгаш Тывазын төлээлеп чедиишкинниг киржир дээрзинге чаңгыс чер чурттуглары бүзүреп турар.
Өвүрде чаарттынган ном саңы
Өвүр кожууннуң Солчурда капитал септелге соонда чаарттынган ном саңының байырлыг ажыдыышкыны болган. Капитал септелгени «Өг-бүле» национал төлевилелдиң ачызында кылган. Өвүр кожуунда бо үш дугаар, а республикада 23 дугаар модельдиг библиотека ажыттынып турары бо.
Ном саңының иштинге ийи зона турган болза, ам ында 6 аңгы шөлчүгеш ажылдап эгелээн: лекциялар болгаш мастер-класстар эрттирер мультимедийлиг зал, коворкинг төп, номчуттунар болгаш уругларга булуңнар. Ном фондузу база немешкен, техниктиг дериг-херекселдер чаарттынган.
Кара-хөлчүлерни хаара тудар төп
Сентябрь 5-те Бай-Тайганың Кара-Хөл сумузунга чаарттынган Культура бажыңының байырлыг ажыдыышкыны болуп эрткен. Ук культура албан чери «Өг-бүле» национал төлевилелдиң культура бажыңнарының аразынга чарлаан Бүгү-российжи мөөрейге тиилээш, оран-савазын чаартыр аргалыг болган.
Федералдыг акшаландырыышкынның ачызында ам Кара-Хөлдүң Культура бажыңы анаа-ла чараш оран-сава эвес, а амгы үениң хөй-талалыг девискээри апарган. Аңаа ажы-төл-даа, улуг улус-даа чогаадыкчы салым-чаяанын ажыдар аргалыг болур. Чаарттынган культура албан чери кара-хөлчүлерни хаара тудар, талантылыг аныяктарны илередир төп апаар дээрзи билдингир.
Салгалдарны каттыштырган хөгжүм
Бии-Хем кожууннуң чүрээ Туран хоорайга патриотчу ырылар мөөрейи болуп эрткен. Хемчегни Төөгүлүг сактыышкын болгаш тыва эки турачыларга ат-алдар хүнүнге, ол ышкаш Ада-чурттуң Улуг дайынының, тускай шериг операциязының болгаш дайынчы хөделиишкиннерниң маадырларынга тураскаадып эрттирген.
Түңнелинде чаңгыстың күүселдезинге Күдерек Оюн Гран-при шаңналынга төлептиг болган. Бирги черни Лапчар Очур, ийигизин Елена Бараан, үшкү черни Күдерек Комбу алганнар. «Мөңгүн үн» деп тускай шаңналды Валерия Ондарга тывыскан.
Ансамбльдер аразынга Хүт сумузунуң «Лесные голоса» ансамбли тергиидээн, ийиги черни Турандан Елена Бараан биле Айзана Байкара, үшкүзүн Турандан «Күзел» деп аттыг пенсионерлер ансамбли алганнар.
А.СОЯН белеткээн.
Чуруктарны кожууннарның чагырга черлериниң социал четкиде арыннарындан алган.
“Шын” №35 2026 чылдың сентябрь 10
"Шын" солуннуң МАХ-каналынга каттыжыңар: max.ru/channel_shyn