«Айыыл чок болгаш шынарлыг оруктар» деп национал төлевилелдиң деткимчези-биле Кызыл хоорайның Колхозная кудумчунуң оруунуң септелгезин «Восток» КХН доозуп турар.
«Восток» КХН-ниң участок даргазы Александр Абариновтуң чугаалааны-биле алырга, орук ажыглалга колдуу белен. «Оруктуң белдирлери болгаш ТывКУ-нуң, Көдээ ажыл-агый техникумунуң девискээрлеринде автомашиналар тургузар черлери, автопавильоннар, доктаамнар, орук дургаар электри чагылары, оруктуң хаажыларын салыпкан, дөрт автомашина оруунуң асфальтызын чадыпкан дээш эң-не кол ажылдар доозулган. 2 километр черге кижи кылаштаар, калбаа 2–2,5 метр тротуарны «Свороток» садыының дужундан Хоочуннар бажыңының дужунга чедир кылыры арткан. Тус черниң чурттакчыларынга аай-дедир чадаг аргыжарынга эптиг байдалдарны тургузар дээш, ук тротуарны кылып турар. Ол девискээрге чадаг кижи орук кежерде, чагыртыр ийи светофорну база тургузары планда көрдүнген» — деп, Александр Абаринов чугаалаан.
ТР-ниң орук-транспорт сайыды Шораан Чыргал-оол ол оруктуң септелгези графикте көрдүнген хуусааларны мурнады чоруп орар дээрзин демдеглээн. «Ниитизи-биле орук кылырынга 600 сая рубль көрдүнген. Бо чылын 250 саязы чарыгдаттына берген. Бо девискээрниң орук тудуунуң ажылы ийи чададан тургустунган дээрзин сагындырайн. Колхозная болгаш Магистральная кудумчузунуң тудушкан черин кылып турар. Аңаа база тротуар болгаш электри чагылары тургузары планда көрдүнген» — деп сайыт чугаалаан.
Орук тудуунуң ажылын Улусчу фронтунуң төлээлери үргүлчү хынап, хайгааралга алган.
«Колхозная кудумчунуң оруунуң тудуун майда кылып эгелээнинден тура хайгаарап келдивис. Ажылдың кол кезии доозулганын көрүп тур бис. Сооктар дүжеринге чедир чадаг кижилер кылаштаар тротуарларның тудуу доосту бээр дээрзинге идегээр-дир бис. Колхозная кудумчунуң оруун чаартканы кончуг эки-дир. Бо орук экижиирге, маңаа орук шимчээшкининиң бачымы чүгээртээр боор» — деп, Улусчу фронтунуң даргазы Сергей Белоусов демдеглээн.
ТР-ниң орук-транспорт сайыдының оралакчызы Шолбан Лакпажаптың медеглээни-биле алырга, «Айыыл чок болгаш шынарлыг оруктар» национал төлевилелдиң деткимчези-биле Тывага миллиардтан көвей түңнүг рубль Кызыл хоорайның болгаш регионалдыг оруктарның тудуунга көрдүнген. Федералдыг бюджеттен 575 сая, а регионнуң бюджединден 464 сая рубльди үндүрери көрдүнген.
2022 чылдың көргүзүглери-биле алырга, «Айыыл чок болгаш шынарлыг оруктар» национал төлевилелдиң деткимчези-биле Тывада орук тудуунга салган сорулгаларны күүседип, а харын-даа мырыңай айыткан хуусаадан мурнады күүсеттинип турар.
Айдың ОНДАР.
«Шын» №76 2023 чылдың октябрь 7