«Россия. Чүректерни каттыштырган» деп Бүгү-российжи III куда фестивалынга Александр Ооржак биле Валерия Доюндуптуң өг-бүлези бүгү чурттан 100 өгленишкен аныяктар аразынга Тываны төлээлеп киржир.
«Өг-бүле дээрге бот-боттарынга эң-не чоок, идегелдиг болгаш чырык хамаарылга-дыр. Ол ышкаш бот-боттарынга ынак, аас-кежиктиг өг-бүле ажы-төлүн кады өстүрүп, деткижери-дир. Бис өг-бүлевисти дыка үнелээр бис, ынчангаш «Россия. Чүректерни каттыштырган» деп Бүгү-российжи III куда фестивалынга киржиривис ол. Кудавысты бир тускай кылдыр эрттирип, чараш, чырык болуушкун кылдыр хуулдурар арга деп санап тур бис» — деп, Александр биле Валерия чугаалаан.
Олар ужуражыр мурнунда Валерия оолдуг, кыстыг, а Александр – оолдуг турган. Чоокта чаа олар база бир кыстыг болган, ам база бир төлдү манап турарлар. Улуг өг-бүлениң кежигүннери хостуг үезинде бойдуска дыштанып, спорт-биле өңнүктежиринге, кино көөрүнге ынактар. Хөй ажы-төлдүг өг-бүле квартира садып алыр, сонуурганчыг аян-чорук кылыр база ажы-төлүнүң өөредилгезинче планнарлыг.
Куда июль 8-те – Өг-бүле, ынакшыл болгаш шынчы чорук хүнүнде Москва хоорайның «Россия» национал парыгынга болур.
Бистиң корр.
Медээни болгаш чурукту Кызыл хоорай мэриязының социал четкиде арнындан алган.
“Шын” №21 2026 чылдың июнь 4
"Шын" солуннуң МАХ-каналынга каттыжыңар: max.ru/join/egenQ...