Январь 18-те Культура хөгжүлдезиниң төвүнге (Спутник микрорайонунда) РФ-тиң Президентизи Владимир Путинниң эгелээшкини-биле тургустунган “Культура” национал төлевилелдиң деткимчези-биле эрткен чылын туттунган чаа оран-савага республика чергелиг "төгерик стол" болуп эрткен.
Аңаа муниципалдыг культура албан черлериниң ажыл-чорудулгазының дугайында чугаалашкан. Аңаа кожууннарның культура эргелелдериниң удуртукчуларындан аңгыда, ТР-ниң Чазак Даргазының оралакчызы Орлан Сарыглар, ТР-ниң культура сайыды Виктор Чигжит, ТР-ниң Чазак Даргазының культура талазы-биле чөвүлекчизи Оксана Тюлюш болгаш өске-даа культура албан черлериниң удуртукчулары, кожуун чагырыкчыларының оралакчылары база киришкен.
Бир дугаар чугаалашкан айтырыы, кожууннарда культура болгаш уран чүүл талазы-биле ажыл-чорудулганы үнелээри-биле, тургустунган рейтинг ёзугаар кайы кожуун канчаар ажылдаанын сайгарып чугаалашкан. Рейтингиниң 2023 чылдың 9 айларының түңнелдери-биле Чөөн-Хемчик, Тес-Хем база Мөңгүн-Тайга кожууннар мурнуку одуругда чоруп турарын илереткен.
ТР-ниң культура сайыды Виктор Чигжит чыылганнарга “Культурлуг десант” деп төлевилел дугайында тодаргай медээни берген. Бо чылдан эгелеп ол төлевилел-биле билдингир уран чогаадыкчы коллективтерниң кожууннарже гастрольдарын планнаан дээрзин сагындырган.
Төлевилел езугаар кожууннарже үнүүшкүн кылыр коллективтер, чүгле сценага оюн-көргүзүг-биле кызыгаарланмайн, комплекстиг ажылды чорудар дээрзин сайыт чугаалаан. Ол дээрге клубтуң фойезинге музейниң база ном делгелгезин чергелештир чорутпушаан, кожууннуң чурттакчыларын профессионал уран чүүлче хөй чонну хаара тудары деп сайыт тайылбырлаан.
Кожууннарда культура уран чүүлдү улам хөгжүдери-биле "төгерик столга" хөй айтырыгларны чугаалашкан соонда, резолюцияны хүлээп алганнар. Ол документ ёзугаар культура ажылдакчыларының ажылын үнелээн демдекти үндүрген соонда, кожуун чагырыкчылары санал киирер пунктулар ёзугаар анализ кылып, демдек бүрүзүн канчаар сайгарары, кадрлар-биле ажыл чорудуп тургаш, кожууннуң культура эргелелинге удуртукчу томуйлаарда, ТР-ниң Культура яамызы-биле чөпшээрежилге чорудары көрдүнген.
Болган хемчегниң түңнелинде кожууннардан удуртукчулар шак ындыг хуралдарны удаа-дараа чорударын чугаалашкаш, Тываның культуразын улам сайзырадыры-биле, ам-даа шудургу ажылдаарын дугурушкаш, тарааннар.
Бистиң корр.
ТР-ниң Культура яамызының медээзи болгаш чуруу.
"Шын" №4 2024 чылдың январь 20
