Бай-Тайга кожууннуң хөмүр-даш склады бо чылдың сентябрь 15-те ажыттынган. Складтың эргелекчизиниң оралакчызы Сергей Салчак бо хүнде хөмүр-даш складының ажыл-чорудулгазын таныштырган:
– Сентябрь айда 1500 тонна хөмүр-даш келген болза, бо хүнде 300 тонна курлавырда бар. Чурттакчы чонга хөмүрнүң өртээ 1 тоннада 3128 рубль, а чартык тоннада 1585 рубль. Кожууннуң чурттакчы чону кайы хире акшалыг кээр – ол хире хөмүрнү садып турар бис. Чоннуң талазындан хомудал келбейн турар. Чүък машиназы чок, хууда чолаачылар-биле кады ажылды чорудуп турар бис.
Хөмүрнү Чадаананың хөмүр уургайындан эккеп турар. Ол хөмүрнүң шынары эки деп чурттакчы чон үнелеп турар. Бир өрегеге, тодаргайлаарга, 3 азы 4 тонна хөмүр садар деп кандыг-даа кызыгаарлаашкын чогун Сергей Салчак дыңнаткан.
Хөмүр-даш складының гаражын септеп, девискээрин долгандыр херимнээш, оорлардан камгалаары-биле ооң кырында шиш баштыг демир четкилерни база быжыглаан. Оон ыңай видеокамераларны база ажыглалга киирип салган. Чаа килди база садып эккеп каан. Чоокку үеде хөмүр-даш складының ажылдакчылары чаа чүък машиназы КамАЗ-тың кээрин база четтикпейн манап турарлар.
Алиса ДОНГАК.
Буян ООРЖАКТЫҢ тырттырган чуруктары.
