Май 11-де, Москвада «Парк Хуамин» деп кыдат ажыл-херек төвүнге, Тыва инвестиция курлавырын таныштырган. Тываның Чазаа «Ажыл-агыйжы Россия» хөй-ниити организациязы-биле «Енисей Сибири» деп хөгжүлде корпорациязының деткимчезинде, Россия Федерациязында Кыдат Улус Республиканың элчин черинге ук хемчегни организастап эрттирген.
Кыдат Улус Республиканың элчин чериниң бүрүн эргелиг сайыды Лю Сюэсун база Тываның Баштыңы Владислав Ховалыг таныштырылганы ажыткан. «Хуамин» делегей корпорациязының чиңгине директору Ли Чжэн, Sany, Norinco, China Unicom компанияларның база China Construction Bank и Industrial and Commercial Bank of China ийи улуг банкыларның топ-менеджерлери Кыдаттың талазындан ужуражылгага киришкен. А Россияны Владислав Ховалыг-биле «Енисей Сибири» корпорацияның база «Ажыл-агыйжы Россия» хөй-ниити организацияның удуртукчулары төлээлээн.
Таныштырылга үезинде тудуг, үлетпүр, туризм болгаш өске-даа адырларда Тываның инвестиция төлевилелдерин сайгарган. Моол база Кыдат-биле кызыгаарлар аразының коридорун тудары-биле холбашкан инициативаларже, ылаңгыя, «Хандагайты» тускай экономиктиг зонаны тударынче онза кичээнгейни углаан. Боттарының төлевилелдерин боттандырарынга кыдат бизнесменнерден идегелдиг партнерларны республика тып алыр боор деп, Тываның Баштыңы чугаалаан.
ТР-ниң Чазааның парлалга албаны.
