Тываның Көдээ ажыл-агый яамызының медеглээни-биле алырга, 2023–2024 чылдарның мал кыштаглаашкынынче республика ниитизи-биле багай эвес белеткелдиг кирген.
Мал чеминиң курлавырларынга 276,9 муң тонна сигенни белеткеп ап шыдаан. Республиканың мал чеминиң тускай курлавырында 2 008,0 тонна, кожууннарның тускай курлавырында 1415,0 тонна сиген бары Көдээ ажыл-агый яамызының медээлеринде айыттынган.
Эрткен чайын сиген Тываның девискээринге багай эвес үнген болгаш, кожууннарда бүгү хевирлерниң бүдүрүлгелери малдың быжыг чем-суурун тургускан. Чижээлээрге, Сүт-Хөл кожууннуң сиген шөлдеринге дүжүткүрү 1 гадан 19–20 центнер. Ынчангаш 30 муң тоннадан хөй сигенни мал чеминге белеткеп, планын 156 хууга күүсеткен. Кызыл кожууннуң девискээринде шөлдерге база эрткен чайын оът-сиген эки үнген — 1 гадан ортумаа-биле 20 центнер. Бо кожууннуң көдээ ишчилери мал чеми белеткээр планын 120 хууга ажыр күүсеткеш, 28 муң тонна сигенни курлавырлап алган. Таңды кожуун мал чеми белеткээр планын–135, Каа-Хем кожуун–115 хуу ажыр күүсеткеннер. Барыын-Хемчик, Өвүр болгаш Тере-Хөл кожууннар база мал чемин хөйнү белеткээн.
Мал чемин хөйнү белеткеп алган кожууннардан Мөңгүн-Тайга, Эрзин болгаш Тес-Хем кожууннарже сигенни сөөртүп чедирип эгелээн. Октябрь айда Эрзин кожуунга 1254,4 тонна, Мөңгүн-Тайга- га—308,5, Тес-Хемге 85 тонна сигенни чедирген. Бо ажыл уламчылап турар.
Ниитизи-биле 3318 коданда малды кыштагладып турар. Оларның 1925-и хууда мал ажыл-агыйлыг өг-бүлелерниң, 970-и тараачын-фермер ажыл-агыйларның, 224-ү көдээ бүдүрүлгелерниң, 199-у көдээ бүдүрүлге кооперативтериниң. Республиканың көдээ ажыл-агыйының ажык медээлери-биле алырга, 3318 кыштагның 2 муң ажыг хирези суг-биле хандыртынган: 634 кыштагда кудуктар бар, 1549 кыштаг кыжын суу доңмас хемчигештер чоогунда.
ТР-ниң Көдээ ажыл-агый яамызының медээлеринден.
“Шын” № 86 2023 чылдың ноябрь 11
