Күрүне кызыгаарыныӊ чурумун үрээр таварылгалар удаа-дараа болуп турар. Бо айтырыгны ийи чурттуӊ эрге-чагырга черлери болгаш эрге-хоойлу камгалаар органнары кады хынамчалыг сайгарып ажылдаар дээрзин Тываныӊ Баштыӊы Владислав Ховалыг социал четкиде блогунга бижээн:
«Бөгүн россия-моол кызыгаарын эртип мал одарладыр чоруктуӊ берге айтырыгларын, ол ышкаш кызыгаар чоогунда девискээрлерде мал оорлаан таварылгаларны Кызыл хоорайда Моолдуӊ чиӊгине консулу Чимид Гандбол, Моолда Увс аймактыӊ губернатору Чулуун Чимэд болгаш эрге-хоойлу камгалаар органнарныӊ ажылдакчылары-биле кады видеоконференция харылзаа таварыштыр сайгарып чугаалаштывыс.
Бо талазы-биле кады ажылдажылганы күштелдирериниӊ чугулазын демдегледим. Бир дугаарында, кызыгаар эртип мал одарладыр болгаш мал оорлаар чорук-биле демисежир угланыышкын-биле ажылдаар комиссияны кады тургузарын онза чугула деп көөр ужурлуг. Өске чаа аргаларны ажылдап кылыр аргалар база бар чадавас.
Моол коллегаларым-биле ужуражып чугаалажырын саналдадым. Тодаргай чугаалажылганы чорудары-биле оларны кызыгаар чоогунда Хандагайты суурже чалап турдум. Баш бурунгаар дугуржулга бар. Шак ындыг ужуражылганы Моолдуӊ элчин чери-биле дугуржуп, аӊаа эрге-хоойлу камгалаар органнарныӊ болгаш кызыгаар албаныныӊ төлээлерин киириштирер, ооӊ-биле чергелештир бистиӊ таладан кызыгаар эртип мал одарладыр болгаш мал оорлаар чорук-биле демисежир ажылдыӊ чедимчелиин үнелеп көөр кылдыр мээӊ оралакчым Виталий Моӊгушевич Бартына-Садыга дагзып кагдым».
Р. Демчик белеткээн.