Бо ай эгезинде Кызылдың мэриниң Кубогу дээш мячылыг хөккейге республика турнири болуп эрткен. Ону ТР-ниң Хоккей федерациязы биле Кызылдың Культура, спорт болгаш аныяктар политиказының талазы-биле департаментизи организастап эрттирген.
Ниитизи-биле турнирге республиканың аңгы-аңгы кожууннарындан 11 команда кээп киришкен. Үш хонук дургузунда үргүлчүлээн маргылдааның финалынче "Шуй","Бай-Тал" база "Кызыл-Даг" – шупту Бай-Тайганың командалары шүглүп артып калган. Кончуг изиг оюннарның түңнелинде, "Кызыл-Даг" команданың ойнакчылары шилиндектер аразындан чемпион болган. Ийиги черни – "Шуй”, үшкү черни – "Бай-Тал" ээлээн.
“Тергиин ойнакчы” атка Бай-Талдан Делгер Начын, “Тергиин дузалакчы камгалакчы” – Иргит Шаанак (Шуй); “Тергиин халдакчы” – Бичелдей Сайын (Кызыл-Даг); “Тергиин камгалакчы” – Монгуш Айдың (Шуй); “Тергиин вратарь” – Салчак Начын (Кызыл-Даг) төлептиг болган.
/ Бистиң корр.
